Էմոմալի Ռահմոնը 10 հազար մարդու համաներման օրինագիծ է ուղարկել Տաջիկստանի խորհրդարան

Տաջիկստանի նախագահ Էմոմալի Ռահմոնն օրենսդրական նախաձեռնության շրջանակներում խորհրդարանի քննարկմանն է ուղարկել «Համաներման մասին» օրինագիծը, որը նախատեսում է ավելի քան 10 հազար մարդու ազատում քրեական ու դատական հետապնդումից: Ինչպես տեղեկացնում է «Արմենպրես»-ը, հղում անելով պետության ղեկավարի մամուլի ծառայությանը, համաներման ընթացակարգն ամենաընդգրկունը կդառնա հետխորհրդային Տաջիկստանի պատմության ընթացքում:

«Այդ օրինագծի ընդունման դեպքում համաներում կկիրառվի 10 հազար կասկածյալների, մեղադրյալների ու դատապարտվածների նկատմամբ,- նշվում է փաստաթղթում:- Օրինագիծը տարածվում է այն անձանց վրա, ովքեր հանցագործություններ են կատարել մինչև դրա ուժի մեջ մտնելը և համաներման կարիք ունեն սեռի, տարիքի, առողջական վիճակի, իրենց կատարած հանցագործությունների վտանգավորության վերանալու տեսանկյունից», հաղորդել է ՏԱՍՍ գործակալությունը: