Մեքսիկայում երեք քաղաքի ոստիկաններ են զինաթափվել 43 ուսանողների անհետանալու կապակցությամբ

Մեքսիկյան երեք քաղաքի մունիցիպալ ոստիկաններ են զինաթափվել այն 43 ուսանողների հետախուզում անցկացնելու շրջանակներում, որոնք երեք շաբաթ առաջ անհետացել են Իգուալա (Գերերո արևմտյան նահանգ) մունիցիպիայի տարածքում տեղի ունեցած ցույցի ժամանակ: Կարգի պահապաններից առգրավել են տաբելային զենքը և կապի միջոցները, որոնք փորձաքննության համար փոխանցվել են հետաքննչական մարմիններին, տեղեկացնում է «Արմենպրես»-ը:

Արսելիա, Բուենավիստա դե Կուելյար և Տասկո քաղաքներում իրավակարգը կպահպանեն համերկրային ոստիկանության ստորաբաժանումները: Այս միջոցն ավելի վաղ արդեն ձեռնարկվել է Իգուալա և Կոպուլա մունիցիպիաների տարածքում, որտեղ 36 ոստիկան է ձերբակալվել ցուցարարների նկատմամբ հաշվեհարդարին մեղսակից լինելու կասկածանքով:

Սեպտեմբերի 26-ին Իգուալայում կարգի պահապանները և մի խումբ զինված քաղաքացիական անձինք գնդակոծել են ուսանողների ցույցը, որոնք բողոքում էին երկրում ընդունված լուսավորության ոլորտի բարեփոխման դեմ: Գնդակոծման հետևանքով զոհվել է վեց, վիրավորվել՝ 25 մարդ: Հաշվեհարդարից հետո հաղորդագրություններ են ստացվել 43 սովորողների անհետանալու մասին, որոնց գտնվելու վայրը մինչ այժմ պարզված չէ: Ինչպես հայտնել են իրավապահ մարմինների ներկայացուցիչները, այն քաղաքների տարածքում, որտեղ զինաթափված են ոստիկանները, հետաքննություն է սկսվել հանցավոր խմբավորումների հետ նրանց ենթադրվող շփումներն ստուգելու շուրջ: Մասնավորապես, խոսքը վերաբերում է «Գերերոս ունիդոս» ելուզակախմբին, որը, նախնական տվյալներով, առնչություն է ունեցել ուսանողների առևանգմանը:

Դրա հետ մեկտեղ մեքսիկական ոստիկանությունը շարունակում է Իգուալայի քաղաքապետ Խոսե Լուիս Աբարկայի հետախուզումը, որն անհետացել է ցուցարարների նկատմամբ հաշվեհարդարից անմիջապես հետո:

Ներկայումս Գերերոյի նահանգում ուսանողների հետախուզման լայնամասշտաբ գործողություն է անցկացվում, որում գործի են դրված բանակի և ոստիկանության խոշոր ստորաբաժանումներ: Սակայն մինչ այժմ կորածների հետքերը չեն հայտնաբերվել, հաղորդել է ՏԱՍՍ-ը: