Ադրբեջանում ռազմական բյուջեի մեծացումը չի ազդում զինվորներին որակյալ սննդով ապահովելու վրա

Ադրբեջանի ռազմական բյուջեի տարեցտարի մեծացումը չի ազդում զինվորներին որակյալ սննդով ապահովելու վրա: Այս մասին հայտնում է ադրբեջանական «Meydan TV» հեռուստաալիքը՝ հղում կատարելով մի շարք զինծառայողների:

2014 թվականին զինծառայությունից վերադարձած Էլչին Ալիզադեն հեռուստաալիքի հետ զրույցում ասել է, որ զինծառայության շրջանում իրենց անորակ սնունդ է տրվել: «Երբեմն մեզ պահածո էին տալիս: Երբեմն էլ այն լցնում էին ճաշի մեջ: Պահակակետ գնալիս կրկնակի սննդապաշար չէր տրվում: Միայն կրկնակի չափով կարագ էր տրվում: Ընդհանուր առմամբ, մեր սնունդը վատ էր», -հեռուստաալիքին ասել է նա:

Ֆիզուլիի շրջանից ճակատային գծում ծառայած մի զինվոր էլ ասել է, որ կարոտ էին մնում որակյալ ճաշի: «Մեր զորամասը գտնվում էր Հարամի հարթավայրում: Մեզ շատ վատ ուտելիք էր տրվում: Ձմռան ամիսներին երբեմն մեզ ճաշ չէին տալիս», -ասել է նա:

Պահուստի գնդապետ-լեյտենանտ Ուզեիր Ջաֆարովը հեռուստաալիքին հայտնել է, որ ադրբեջանական բանակում ոչ կանոնադրական գործողությունները նաև կոռուպցիայի արդյունք են. «Բանակում տեղի ունեցող ապօրինությունները պետք է գնահատվեն կոմպլեքս կերպով. հրամանատարական անձնակազմի հոգեբանական վիճակից սկսած մինչև կոռուպցիա՝ բոլոր գործոնները հաշվի առնելու միջոցով: Ոչ կանոնադրական դեպքերի, ոչ մարտական պայմաններում զինվորների մահերի մեջ քիչ չէ բանակում տարածված կոռուպցիայի և սպայական անձնակազմի ոչ բավարար ուշադրության մեղքի բաժինը», -ասել է նա:

Լրագրողների ռազմական հետազոտությունների «Դոկտրինա» կենտրոնի համաձայն՝ 2014 թվականի հունվար-սեպտեմբեր ամիսների ընթացքում 87 զինծառայողներ զոհվել են ոչ մարտական պայմաններում:

Հեռուստաալիքը հայտնում է, որ չնայած Զաքիր Հասանովը նոր պաշտպանության նախարար է, սակայն, 2003-2013 թվականներին նա եղել է Ներքին զորքերի հրամանատար, և 10 տարիներին, լինելով քաղաքական իշխանության հենասյուներից մեկը, Ներքին զորքերի ամբողջ մատակարարումը գտնվել է նրա վերահսկողության տակ:

2014 թվականի հունվար-մայիս ամիսների համար զինված ուժերում գնումների ռեեստրի ուսումնասիրությամբ հեռուստաալիքը պարզել է, որ գալով պաշտպանության նախարարի պաշտոնին՝ Զաքիր Հասանովն իր հետ բերել է նաև իր վերահսկողության տակ եղած ընկերությունները: Զ.Հասանովը ռազմական բյուջեն վերահսկելու համար ֆինանսական վարչության պետ է նշանակել իր կադրը համարվող գնդապետ-լեյտենանտ Նամիգ Փոլադովին: Վերջինս երկար տարիներ եղել է Ներքին զորքերի ֆինանսական բաժնի պետը: Ն.Փոլադովն իր հերթին փոխել է ՊՆ ավանդական մատակարարներին: Զ.Հասանովի պաշտպանության նախարա ր նշանակվելուց հետո Ներքին զորքերի մրցույթների մշտական հաղթող մի շարք ընկերություններ հաղթեցին նաև ՊՆ հայտամրցույթներում: 2012-2014 թվականների համար Պետական գործակալության գնումների գծով տենդերային ռեեստրի համաձայն, մինչև 2013 թվականը Ներքին զորքերի տենդերների մշտական հաղթող «Pasha K», «Inistal-servis», «Sputnik-12», «Grafik-Simvol», «Simurg-Inshaat», «Selva», «Uhud», «Azmashkom-Tex LTD1», «Treyder LTD», «A.B.-ALYANS COMPANY LTD», «Xezer-11», «Efir-1», «Logman-2014», «Samurat-R» բոլոր ընկերությունները, որոնք գրանցված են միևնույն հ ասցեում, դարձել են 2013 և 2014 թվականների ՊՆ տենդերների հաղթողներ:

Ադրբեջանական ԶԼՄ-ներն ավելի վաղ հայտնել էին, որ 2013 թվականին Ադրբեջանի սուպերմարկետներում ապօրինի կերպով հայտնվել էին պահածոներ, որոնք նշանակված են եղել միայն զինված ուժերի զինվորների և սպաների համար: