Մարդկանց վրա Էբոլայի դեմ պատվաստանյութի փորձարկումները կսկսվեն երկու շաբաթվա ընթացքում

Կամավորների վրա դեղորայքային պատրաստուկների փորձարկումները, որոնք, հնարավոր է՝ կկարողանան հաղթահարել մահացու Էբոլա վիրուսը, կսկսվեն առաջիկա երկու շաբաթվա ընթացքում: Այդ մասին, ինչպես տեղեկացնում է «Արմենպրես»-ը, հոկտեմբերի 21-ին Ժնևում կայացած մամուլի ասուլիսում հայտարարել է ԱՀԿ-ի գլխավո ր քարտուղարի՝ ինովացիաների և առողջապահության համակարգերի հարցերով օգնական դոկտոր Մարի Պոլ Կիյնին:

«Մենք հուսով ենք, որ պատվաստանյութերի առաջին կլինիկական փորձարկումները կսկսվեն առաջիկա երկու շաբաթներին: Թեստավորումը կտևի 6 ամսից մինչև մեկ տարի»,-ասել է նա:

Ավելի վաղ հաղորդվել է, որ հիվանդության տարածման դեմ պայքարելու համար պատրաստվող առաջին միջոցների մեկը կլինեն ամերիկյան NewLink Genetics ընկերության VSV-EBOV պատրաստուկները, որոնք մշակել են Կանադայի միկրոկենսաբանության պետական լաբորատորիայի գիտնականները: Այս և Մեծ Բրիտանիայի GlaxoSmithKline (GSK) դեղագործական հսկայի ChAd-EBO պատրաստուկը աջակցություն են ստանում ԱՀԿ-ի կողմից:

Կազմակերպությունը հայտարարել է, որ եթե պատրաստուկների անվտանգությունն ապացուցվի, դրանք պետք է բուժաշխատողներին տրամադրվեն մինչև նոյեմբեր, իսկ լայն օգտագործման համար՝ մինչև 2015 թվականի սկիզբը:

Ավելի վաղ Reuters-ը հաղորդել է, որ Էբոլայի դեմ փորձարարական դեղամիջոց արտադրած չինական Sihuan Pharmaceutical Holdings Group Ltd դեղագործական ընկերությունը աֆրիկյան երկրներ է ուղարկել JK-05 պատրաստուկի մի քանի հազար չափաբաժին՝ մահացու վտանգավոր տենդի դեմ պայքարելու համար: Սկզբնապես պատրաստուկը կօգտագործվի տարածաշրջանում աշխատող չինացի բժիշկների կողմից՝ վիրուսով վարակվելու դեպքում, հետագայում պլանավորվում են կլինիկական փորձարկումներ, այդ թվում և աֆրիկացի հիվանդների վրա:

Առողջապահության համաշխարհային կազմակերպության վերջին տեղեկատվության համաձայն՝ ներկայում Էբոլա վիրուսով վարակվածների թիվը ավելի քան 9 հազար է, շուրջ 4,5 հազար մարդ մահացել է, հաղորդել է ՌԻԱ Նովոստին: