Էբոլա տենդից 4555 մարդ է մահացել. ԱՀԿ

Առողջապահության համաշխարհային կազմակերպության (ԱՀԿ) արտակարգ կոմիտեն հոկտեմբերի 22-ին քննարկելու է Արևմտյան Աֆրիկայի երկրներում Էբոլա վիրուսի համաճարակի հետ կապված իրադրությունը: Այդ մասին, ինչպես տեղեկացնում է «Արմենպրես»-ը, հոկտեմբերի 21-ին Ժնևում լրագրողներին հայտնել է կազմակերպության պաշտոնական ներկայացուցիչ Ֆադելա Շայբը:

Նրա խոսքով՝ արտակարգ կոմիտեի՝ սեպտեմբերին կայացած վերջին նիստից հետո «շատ բան է տեղի ունեցել»: «Հիվանդանալու դեպքեր են գրանցվել Իսպանիայում և ԱՄՆ-ում: Միևնույն ժամանակ հայտարարվել է Նիգերիայում և Սենեգալում Էբոլա մահացու վիրուսի բռնկման վերացման մասին»,-նշել է նա:

Շայբի խոսքով՝ նիստում, որը կդառնա թվով երրորդը և ավանդույթի համաձայն կանցկացվի տեսակապի ռեժիմով, կորոշվի՝ «վերջին իրադարձությունների լույսով գոյություն ունի արդյոք նոր հանձնարարականների անհրաժեշտություն»: Մինչ այդ առողջապահության բնագավառում ՄԱԿ-ի հատուկ գործակալության փորձագետները դեմ են արտահայտվել այն երկրներ միջազգային ուղևորությունների և նրանց հետ առևտրի սահմանափակմանը, որտեղ Էբոլա վիրուսի բռնկում է դիտվել:

ԱՀԿ-ի տվյալներով՝ անցյալ տարվա դեկտեմբերին Գվինեայում հիվանդության բռնկման պահից սուր վիրուսային ինֆեկցիայի զոհ է դարձել 4555 մարդ, վարակված են 9216-ը: Գործնականում մահվան և վարակման բոլոր դեպքերը բաժին են ընկնում արևմտաաֆրիկյան երեք երկրների՝ Գվինեային, Լիբերիային և Սիեռա Լեոնեին: ԱՄՆ-ում երեք մարդ է վարակվել վիրուսով, նրանցից մեկը մահացել է, Իսպանիայում վիրուսը հայտնաբերվել է միայն մեկ մարդու մոտ: «Նիգերիայում գրանցվել է մահվան ութ և վարակման քսան դեպք, իսկ Սենագալում հիվանդացել է մեկ մարդ: Վերջին երկու երկրներում հիվանդության բռնկումը վերջնականապես ավարտված է հայտարարվել, հաղորդել է ՏԱՍՍ-ը: