Ընտրվել է ՄԱԿ-ի Մարդու իրավունքների խորհրդի նոր կազմը

ՄԱԿ-ի Գլխավոր ասամբլեայի 29-րդ լիագումար նիստի ընթացքում ընտրվել է համաշխարհային կազմակերպության Մարդու իրավունքների խորհրդի (ՄԻԽ) նոր կազմը, որում ընդգրկվել է 11 նոր անդամ, տեղեկացնում է «Արմենպրես»-ը:

Խորհրդի 15 թափուր տեղերի համար պայքարում էր 17 պետություն: Չհավաքելով բավարար քանակությամբ ձայներ՝ Խորհրդում տեղ չեն գտել Կոստա Ռիկան և Թաիլանդը: Նորացված ՄԻԽ-ում աֆրիկյան խումբը կներկայացնեն Գանան և Նիգերիան, որոնք կփոխարինեն Բենինին և Բուրկինա-Ֆասոյին, իրենց հերթին Բոթսվանան և Կոնգոն քվեարկության արդյունքում ընտրվել են երկրորդ ժամկետով:

Ասիախաղաղօվկիանոսյան տարածաշրջանի երկրների խմբից Խորհրդում կընդգրկվեն Բանգլադեշն ու Քաթարը՝ փոխարինելով Ֆիլիպիններին և Քուվեյթին, իսկ Հնդկաստանը և Ինդոնեզիան մնում են երկրորդ ժամկետով: Արևելաեվրոպական պետություններից ՄԻԽ են մտել Ալբանիան և Լատվիան, որոնք կփոխարինեն Չեխիային և Ռումինիային:

Բոլիվիան, Սալվադորը և Պարագվայը Մարդու իրավունքների խորհրդի նորացված կազմում կփոխարինեն Չիլիին, Պերուին և Կոստա Ռիկային:

Արևմտաեվրոպական և այլ պետությունների խումբը ՄԻԽ-ում կներկայացնեն Նիդեռլանդներն ու Պորտուգալիան, որոնք կփոխարինեն Ավստրիային և Իտալիային:

ՄԻԽ-ը ՄԱԿ-ի իրավապաշտպան մարմինն է, որի մեջ մտնում են 47 պետություն՝ շրջափոխման սկզբունքով: Այն ստեղծվել է 2006 թվականին՝ փոխարինելով ՄԱԿ-ի Մարդու իրավունքների հանձնաժողովին:

ՄԻԽ-ի անդամներն ընտրվում են ՄԱԿ-ի Գլխավոր ասամբլեայի կողմից: Յուրաքանչյուր անդամի լիազորությունների ժամկետը երեք տարի է, ՄԻԽ-ին անդամակցության հնարավոր ժամկետների թվաքանակը սահմանափակված է երկուսով, հաղորդել է ՌԻԱ «Նովոստին»: