ՀՀ արդարադատության նախարարին ուղղված ՍԴՀԿ ատենապետ Լյուդմիլա Սարգսյանի 23.02.2012թ. բաց նամակի պատասխանը

Ներկայացնում ենք նամակն ամբողջությամբ.

«Հարգելի տիկին Սարգսյան,

Ձեր կողմից 16.02.2012թ. ՀՀ արդարադատության նախարարություն ներկայացրած դիմումը՝ 14.02.2012թ. Սոցիալ-Դեմոկրատ Հնչակյան կուսակցության նոր խմբագրությամբ կանոնադրության և նոր ատենապետի մասին տեղեկությունների գրանցումը անվավեր ճանաչելու վերաբերյալ, մուտք է եղել 20.02.2012թ.:

«Վարչարարության հիմունքների և վարչական վարույթի մասին» ՀՀ օրենքի 30-րդ հոդվածի 2-րդ մասի համաձայն՝ ՀՀ ԱՆ աշխատակազմի օրինականության վերահսկողության տեսչության կողմից 20.02.2012թ. հարուցվել է վարչական վարույթ, որի հետագա քննության իրականացումը հանձնարարվել է իրավաբանական անձանց պետական ռեգիստրի և ոչ առևտրային կազմակերպությունների գործունեության օրինականության վերահսկողության բաժնին: Պատշաճ կերպով Ձեզ եռօրյա ժամկետում ծանուցվել է վարչական վարույթի հարուցման մասին:

Համաձայն «Վարչարարության հիմունքների և վարչական վարույթի մասին» ՀՀ օրենքի 46-րդ հոդվածի 1-ին մասի. «Վարչական վարույթի առավելագույն ժամկետը 30 օր է: Օրենքով կարող են սահմանվել հատուկ՝ 30 օրից կարճ կամ ավելի երկար ժամկետներ»: Նույն Օրենքի 36-րդ հոդվածը միաժամանակ սահմանում է, որ վարչական վարույթը պետք է իրականացվի հնարավորինս սեղմ ժամկետներում, եթե իհարկե վարչական վարույթ հարուցելուց հետո վարչական մարմնի տրամադրության տակ առկա են համապատասխան վարչական ակտ ընդունելու համար անհրաժեշտ փաստաթղթերը, բավարար չափով պարզաբանված և ճշգրտված են տվյալ գործի հանգամանքները:

Պետք է նշել, որ սույն հոդվածի պահանջները իրականացվող վարույթի վրա կիրառելի չէ, քանի որ Օրենքի 37-րդ հոդվածի 1-ին մասը հստակ սահմանվում է հետևյալը. «Վարչական մարմինը պարտավոր է ապահովել փաստական հանգամանքների բազմակողմանի, լրիվ և օբյեկտիվ քննարկումը՝ բացահայտելով գործի բոլոր, այդ թվում ՝ վարույթի մասնակիցների օգտին առկա հանգամանքները»: Այսինքն՝ գործի բազմակողմանի քննարկումը նշանակում է բոլոր այն հարցերի պարզաբանումը, որոնք առնչվում են վարույթի առարկային: Իսկ յուրաքանչյուր հարց պետք է պարզաբանվի լրիվ ծավալով: Տվյալ գործին առնչվող բոլոր փաստերի համակցությամբ՝ բացահայտում է գործի լրիվ քննարկման նշանակությունը: Իրավաչափ որոշում ընդունելու համար անհրաժեշտ է, որպեսզի մինչև վարույթով որոշում ընդունելը վարչական մարմինն իրազեկ դառնա գործի ելքով շահագրգիռ բոլոր անձանց կարծիքներին: Բացի այդ, գործի բազմակողմանի քննարկումը վարչական մարմնի պարտականությունն է և այս սկզբունքի ապահովման նպատակով տեսչությունը սահմանափակված չէ վարույթի մասնակիցների կողմից ներկայացված տեղեկություններով և ապացույցներով: Ուստի տեսչությունը պարտավոր է ձեռնարկել անհրաժեշտ միջոցներ՝ բացառապես օրենքից բխող որոշում կայացնելու համար, ինչը կարող է ապահովել առկա փաստական հանգամանքների օբյեկտիվ և բազմակողմանի գնահատմամբ:

ՀՀ ԱՆ օրինականության վերահսկողության տեսչության պետ՝

Նորայր Փանոսյան»։