Սյունիքի դպրոցներում կազմավորվում են «Պատանի երկրապահ» ջոկատներ

ՀՀ կրթության և գիտության, ՊՆ նախարարությունների ու «Երկրապահ կամավորական միություն» ՀԿ-ի` այս տարվա սեպտեմբերին կնքված փոխըմբռնման հուշագրի շրջանակում Սյունիքի դպրոցներում սկսվել է «Պատանի երկրապահ» ջոկատների կազմավորման գործընթացը, որի նպատակն է խթանել սովորողների հայրենասիրական դաստիարակությունը:

Կապանի թիվ 6 հիմնական դպրոցում նոյեմբերի 17-ին կայացած ջոկատի հիմնման անդրանիկ միջոցառմանը մասնակցել են նաև «Երկրապահ կամավորական միության» Սյունիքի մարզային կառույցի նախագահ, Սյունիքի մարզպետ Սուրիկ Խաչատրյանը, Կապանի քաղաքապետ Աշոտ Հայրապետյանը, ազատամարտիկներ: Ողջունելով նորաթուխ երկրապահներին` Սյունիքի մարզպետ Սուրիկ Խաչատրյանը կարևորեց ջոկատի ստեղծումը աշակերտների համար: «Պատերազմները դաժան են լինում այն ժողովուրդների համար, ովքեր պատերազմի մշակույթին անծանոթ են, թողնում են հող, հայրենիք, ծուխ, օջախ և հեռ անում», - իր խոսքում ասաց Սուրիկ Խաչատրյանը: Կապանի թիվ 6 դպրոցի նորաստեղծ «Պատանի երկրապահ» ջոկատին անդամագրվեցին 17 աշակերտ, ովքեր մեծ հանդիսավորությամբ երդում տվեցին` պատվով ծառայել հայրենիքին: Դպրոցը պարգևատրվեց «Երկրապահ կամավորական միության» պատվոգրով: Միջոցառման ավարտին դպրոցում հանդիսավորությամբ բացվեց պատանի երկրապահ կամավորականների դասարանը: Աշակերտներին հանձնվեցին պատանի երկրապահ ակումբների ձևավորման և հայրենասիրական դաստիարակության ուղեցույցներ: