«Վանա լճի մակարդակն ընկնում է». թուրք մասնագետ

Վանի «Հարյուրերորդ տարի» համալսարանի աշխարհագրության բաժնի դասախոս Ֆարուք Ալաեդդինօղլուն հայտնել է, որ Վանա լճի մակարդակն ամեն անցնող տարում ավելի է նվազում, և այդ պատճառով նրա քարտեզը փոխվում է: Այս մասին, ինչպես հաղորդում է «Արմենպրես»-ը, թուրք մասնագետը հայտնել է թուրքական IHA լրատվական գործակա լության թղթակցի հետ զրույցում:

«Վանա լճի հայելու մակարդակն ամեն տարի ընկնելու պատճառով նրա քարտեզը փոխվում է: Մենք երկար տարիներ հետևում ենք այդ գործընթացին՝ պարզելու, թե դեռ ինչքան կարող է իջնել լճի մակարդակը: Աշխատանքները չենք կարողանում ավարտին հասցնել այն պատճառով, որ անհրաժեշտ են արբանյակային նկարահանումներ, ինչի համար պահանջվող ֆինանսական միջոցներ դեռևս չունենք: Եթե կարողանանք ստանալ այդ պատկերները, կկարողանանք նաև մոդելավորել լճի մակարդակի անկման ընթացքը», -ասել է նա:

Նրա խոսքով՝ իրենց դիտարկումները ցույց են տալիս, որ լճի արևելյան ափն արդեն փոխել է քարտեզը, մասնակիորեն փոխվելու է նաև հյուսիսարևելյան և ամբողջությամբ՝ հյուսիսային հատվածների քարտեզը:

«Մենք փորձում ենք պատասխան ստանալ, թե մակարդակի նման անկման պայմաններում 10, 20, գուցե և 50 տարի հետո ինչպիսի՞ն կլինի լճի հայելին, և որքա՞ն ետ կքաշվի ջուրը», -նշել է նա:

Լճի ջրի մակարդակի անկման պատճառն, ըստ թուրք մասնագետի, գոլորշիացումն է, որը կանխելու որևէ մեթոդ կամ բանաձև գոյություն չունի, ինչի պատճառով Վանա լճի հայելին գնալով փոքրանալու է: