Վերանորոգվել է Նոր Կեսարիա-Շենավան-Գետաշեն ճանապարհահատվածը

ՀՀ Արմավիրի մարզի Նոր Կեսարիա, Շենավան և Գետաշեն համայնքների բնակիչներն կարող են բնականոն երթևեկել արդեն վերականգնված ճանապարհով: Համաշխարհային բանկի ֆինանսավորմամբ իրականացվող «Կենսական նշանակության ճանապարհային ցանցի բարելավում» ծրագրի շրջանակներում 2013 թվականին մեկնարկել և 2014 թվականին ավարտվել են Մ5-Նոր Կեսարիա-Շենավան-Գետաշեն 5.32 կմ երկարություն ունեցող ճանապարհային հատվածի վերականգնման աշխատանքները:

Մինչև վերականգնումը, ճանապարհային հատվածի հողային պաստառը գտնվում էր վատ վիճակում, ճանապարհային պատվածքը խիստ քայքայված էր, առաջացել էին տարբեր խորությամբ և մակերեսով փոսեր, որի պատճառով տվյալ հատվածում երթևեկությունը դարձել էր դժվարանցանելի: Անմխիթար վիճակում էին նաև ջրահեռացման համակարգերը, արհեստական կառուցվածքները, երթևեկության կազմակերպման ու անվտանգության տարրերը:

Ինչպես տեղեկացնում են ՀՀ տրանսպորտի և կապի նախարարության «Հայաստանի ավտոմոբիլային ճանապարհների տնօրինություն» ՊՈԱԿ-ից, «Սիսիանի ԲՈՒԱՏ» ՍՊ ընկերության կողմից կատարվել են հողային պաստառի և ջրահեռացման համակարգերի վերականգնման, ասֆալտբետոնե ծածկի կառուցման, կողնակների վերականգնման, արհեստական կառուցվածքների նորոգման, Նոր Կեսարիա, Շենավան և Գետաշեն համայնքներում՝ մայթերի կառուցման, անվտանգության տարրերի վերականգնման աշխատանքներ: Վերականգնվել է նաև ճանապարհից դեպի Շենավան համայնքի դպրոց տանող 0.4 կմ երկարությամբ իջատեղը:

Աշխատանքները, որոնց պայմանագրային արժեքը 627. 792.289 ՀՀ դրամ է, իրականացվել են ՀՀ տրանսպորտի և կապի նախարարության «Տրանսպորտի ԾԻԳ» պետական հիմնարկի պատվերով: ՀՀ տրանսպորտի և կապի նախարարի հրամանով ձևավորված շինարարական օբյեկտը շահագործման ընդունող հանձնաժողովի կազմում ընդգրկված են եղել ՀՀ տրանսպորտի և կապի նախարարության, «Հայաստանի ավտոմոբիլային ճանապարհների տնօրինություն» ՊՈԱԿ-ի, «Տրանսպորտի ԾԻԳ» ՊՀ-ի, ՀՀ Արմավիրի մարզպետարանի, ՀՀ ֆինանսների նախարարության աշխատակազմի ֆինանսաբյուջետային վերահսկողության, ՀՀ քաղաքաշինության նախարարության աշխատակազմի քաղաքաշինական պետական տեսչության, կապալառու կազմակերպության, տեխնիկական հսկողություն իրականացնող կազմակերպության պատասխանատու աշխատակիցներ, շահագրգիռ համայնքների ղեկավարները: