Անանուն մեղադրանքներ կամ պատվերով համերգ

«ՉԻ» զրուցակիցն է Թերապևտիկ և ընտանեկան ստոմատոլոգիայի ամբիոնի դոցենտ Լազար Եսայանը.

- Շրջանառության մեջ է դրվել ձայնագրություն, որի շրջանակներում Դուք հայտարարում եք, թե ղեկավարությունն արդեն որոշել է՝ Դուք եք լինելու ամբիոնի վարիչի պաշտոնում, և դա այլևս քննարկման ենթակա չէ: Եթե նման հայտարարություն եք անում, ըստ էության, մրցույթն արդեն կասկածի տակ է դրվում: Ի՞նչ եք նկատի ունեցել՝ սա ասելով:

-Այո, ես նշել եմ, որ վերադառնում եմ, և իմ հայտարարություններն ամեն մեկը կարող է մեկնաբանել իր ընկալածի չափով: Խնդիրն այն է, որ ցանկացած ղեկավար իրեն իրավունք կարող է վերապահել ունենալ նախընտրելի թեկնածու, բայց սա չի նշանակում, որ դրանով որոշվում են մրցույթի արդյունքները կամ ելքը: Ինչ վերաբերում է «քննարկման ենթակա է» արտահայտությանը, ապա ես նկատի եմ ունեցել այն, որ չեմ պատրաստվում քննարկել իմ ղեկավարության կողմից կայացրած որոշումը:

Հայտարարությունն արված է հետևյալ իմաստով՝ ես վերադառնում եմ՝ հայտ ներկայացնելով այդ պաշտոնի համար, և դրա մասին տեղյակ է նաև բժշկականի ղեկավարությունը: Ինչ վերաբերում է ընտրություններին, ապա դրանք անցնում են փակ-գաղտնի քվեարկության պայմաններում, և որևէ մեկը չի կարող դրանց ելքի վերաբերյալ նախօրոք հայտարարություններ անել։

- Լարվա՞ծ են Ձեր և ամբիոնի աշխատակիցների հարաբերությունները: 

- Ես ընդհանրապես նման լարվածություն չեմ զգացել: Այդպիսի բան պարզապես չկա: Եթե լիներ, ապա ընտրությունների նախնական՝ ամբիոնական նիստի երաշխավորության փուլում, փակ-գաղտնի ընտրություններում, ամբիոնի 21 մասնակիցներից 18-ն ինձ հաջորդ փուլի համար չէր երաշխավորի: Այս դեպքում ես եմ Ձեզ հարց տալիս՝ եթե փակ-գաղտնի քվեարկության ժամանակ 18 մարդ համաձայնություն է տալիս, որ ինձ հետ ցանկություն ունի աշխատելու, էլ ինչի մասին կարող է խոսք լինել:

- Ձեզ նաև մեղադրում են՝ ասելով, թե Ձեր ջանքերով անհետացել են պետպատվերի համար հատկացված նյութերը, կլինիկայում ամբիոնի աշխատակիցներից թիվ 1 համալսարանական ստոմատոլոգիական կլինիկայում աշխատելու համար «կռեսլոյի» գումարներ եք հավաքել, որը երբեմն ավելի շատ է եղել, քան նրանց ստացված աշխատավարձը, մինչդեռ պայմանագրով սահմանված չի եղել, որ ամբիոնի աշխատակիցները պետք է գումար վճարեն: 

- Խնդիրն այն է, որ եթե ամբիոնի աշխատակիցը զբաղվում է կլինիկական աշխատանքով, այսինքն՝ հիվանդներ է ընդունում և նրանց ծառայություններ մատուցում, բնականաբար, հիվանդները պետք է վճարեն: Երևանի բշժկական համալսարանի կլինիկաները բարեգործական հաստատություններ չեն: Միայն անվճար բուժօգնություն է ցուցաբերվում նրանց համար, ովքեր ձևակերպված են պետպատվերով: Ի տարբերություն այլ բուժհաստատությունների՝ այստեղ շատ ավելի խիստ է վերահսկվում գործընթացը, և ամեն ինչ ընթանում է օրենքին համապատասխան: Այն ժամանակ էլ, երբ հայտարարվում էր, որ ցանկացած մուծում պետք է մուտք արվի դրամարկղ, որոշ մարդկանց ձեռք չէր տալիս: Ամբողջը մեզ մոտ փաստաթղթավորված է: Տարիների հաշվապահություն կա, և անպատասխանատու հայտարարություններին կարող եմ հակադրել այն ամբողջ փաստաթղթաշրջանառությունը, որն այսօր կա: 

Խոսքն այստեղ «կռեսլոների» մասին չէ: Խոսքն այցելուի վճարման մասին է: Կարգն այսպիսին է՝ բժշկական համալսարանի ղեկավարությանն կողմից կա սահմանված գնացուցակ: Այդ գնացուցակի շրջանակներում էլ ծառայություններ են մատուցվում, և ծառայության համար այցելուն վճարում է դրամարկղում: Համապատասխան վճարից հոնորար է գոյանում նաև բժշկի համար, որը գումարվում է նրա աշխատավարձին: Իսկ դեղորայքն անցնում է դեղատուն-պահեստ-կլինիկա օղակներով, և հետո հաշվարկվում է նյութածախս: Եթե դեղորայքը յուրացվել է, ապա հարց է առաջանում՝ ինչպե՞ս ենք մենք սպասարկել այցելուներին: Ինչո՞վ են նրանք բուժվել: Զավեշտալի մեղադրանք է: Ես կուզենայի նաև հրապարակման հեղինակը բացատրեր, թե ես ինչպես կարող էի ֆինանսական յուրացումներ անել, եթե ես ընդհանրապես իրավունք չունեմ բժշկական համալսարանում ֆինանսական գործարքներ կատարել: Այդպիսի իրավունք ունի միայն համալսարանի ղեկավարը: 

- Ձայնագրության մեջ նաև ասել եք. «Իմ գալուց հետո առաջին խնդիրը լինելու է այն, թե քանի սենյակ եմ ես զբաղեցնելու: Դա պիտի լինի, և դա ես անմիջապես կքննարկեմ իմ ղեկավարության հետ: Համապատսախան սենյակներում, համապատասխան դրույքներով մենք կաշխատենք: Բնականաբար, ես չեմ ասի, որ դուք վճարումներ չեք անելու: Բնականաբար պիտի անեք: Եթե «կռեսլո» պիտի զբաղեցնեք, ուրեմն՝ պիտի վճարեք: Ի՞նչ գումար և ինչպե՞ս՝ դա ես նույնպես իմ ղեկավարության հետ կքննարկեմ»: Ինչպես կբացատրեք Ձեր այս հայտարարությունը: 

-Այս շենքում գործում է երեք հիմնարկություն՝ թերապևտիկ և ընտանեկան ստոմատոլոգիայի ամբիոնն է, նոր ստեղծված ընդհանուր ստոմատոլոգիայի կուրսը և թիվ 1 համալսարանական ստոմատոլոգիական կլինիկան: Բոլորն էլ օգտվում են այս շենքի ու կլինիկայի ծառայություններից: Խնդիրն այն է, որ պետք է հստակեցվի, թե որ սենյակներում են աշխատելու թերապևտիկ և ընտանեկան ստոմատոլոգիայի ամբիոնի աշխատակիցները, որի պարագայում նրանք կընդունեն այցելուներ: 

Գումարի մասով էլ ասեմ հետևյալը: Ուսումնական գործընթացում ընդգրկված մարդիկ՝ կլինիկական օրդինատորները և ուսանողները, պետք է կարողանան պացիենտին սպասարկել համապատասխան զեղչերով: Գործում է կարգ, համաձայն որի՝ ուսանողին կամ կլինիկական օրդինատորին այցելուն հաստատված գնացուցակի 50 տոկոսի չափով պետք է վճարեր: Սա ընդունված կարգ է ամբողջ աշխարհում՝ ուսանողի կամ կլինիկական օրդինատորի կողմից սպասարկվող քաղաքացիներն այդ ծառայությունների համար կամ չեն վճարում կամ էլ մեծ տոկոսանոց զեղչերից են օգտվում: Այսօր չեմ կարող ասել՝ ինչպես է, քանի որ համալսարանում կլինիկական աշխատանքով չեմ զբաղվում: 

Հիմա նորից եմ կրկնում այն, ինչ ասել եմ ձայնագրության մեջ: Եթե «կռելսո» պետք է զբաղեցնեն, ուրեմն պետք է վճարեն: Կրկնում եմ՝ սա միայն այցելուի ընդունելության պայմաններում: Եթե այցելու են ընդունում և ծառայություն մատուցում, ուրեմն պետք է «կռեսլոյի» համար վճարեն, եթե ոչ, ուրեմն՝ ոչ: Եթե «կռեսլո» են զբաղեցնում, ուրեմն հիվանդ են ընդունում, եթե ընդունում են, ուրեմն պետք է վճարեն: Կարգն այդպիսին է: Իսկ թե ինչքան պետք է վճարեն, սա իմ լիազորություններից դուրս է, դա որոշվում է գնացուցակին համապատասխան, այնպես որ ես խոսել եմ օրինական գործարքի մասին: Եվ այդտեղ որևէ արտառոց բան չկա: 

Եթե որևէ մեկը կարող է ասել, թե ես մեկից գումար եմ վերցրել, այսպես կոչված «ռեկետով» եմ զբաղվել, խնդիր չկա, ես պատրաստ եմ դրա համար պատասխանատվություն կրել: 

- Ինչո՞ւ են, ըստ Ձեզ, նիստը ձայնագրել:

- Առջևում ընտրություններ են, և ես կարծում եմ, որ այս ամենն արվում է դրանք խոչընդոտելու համար: Փորձում են ինձ մի հոգեվիճակի բերել, որ ես հրաժարվել մասնակցել ընտրություններին: Բայց ես վստահեցնում եմ, որ մասնակցելու եմ այդ ընտրություններին: Թող ընտրվի նա, ով արժանի է: 

Հ.Գ. Հրապարակման մեջ խոսք էր գնում այն մասին, որ Լազար Եսայանը հաջողությունների է հասել եղբոր շնորհիվ, ով համարվում է Աղվան Հովսեփյանի յուրայիններից մեկը: Մեզ հետ զրույցում Լազար Եսայկանն ասաց, թե ինքը չի հրաժարվում իր ազգականներից, պարզապես քանի առիթ է ներկայացել, ուզում է շնորհակալություն հայտնել այն մարդկանց, ովքեր աջակցել են իրեն իր կարիերայի բարձունքին հասնելու համար: «Իմ կարիերան սկսվել է դեռևս 1992-93թթ.: Շնորհակալ եմ Ալֆրեդ Ֆրանսովիչին, Գոհար Օհանյանին (նրանք եղել են թիվ 2 ստոմատոլոգիական կլինիկայի՝ այդ տարիների գլխավոր բժիշկները), Արզիկ Պետրովնային, իմ առաջին ռեկտոր Վիլեն Պարույրովիչին (նրա օրոք ես սկսել եմ աշխատել համալսարանում), Գոհար Քյալյանին, Արա Միքայելի Մինասյանին (նրա օրոք 2002-2003թթ. ես աշխատել եմ Սուրբ Գրիգոր Լուսավորիչ բժշկական կենտրոնի ստոմատոլոգիական բաժանմունքի վարիչ), Արտյոմ Մաքսիմի Քուշկյանին, Դերենիկ Դումանյանին, ինչպես նաև այսօրվա ղեկավարությանը՝ Միքայել Նարիմանյանին և ՀՀ առողջապահության նախարար Արմեն Մուրադյանին: Այս բոլոր մարդիկ իմ կարիերայի և առաջընթացի համար ունեցել են մեծ դեր ու նշանակություն»,- ասաց «ՉԻ» զրուցակիցը: 

Հաջորդիվ ձեր ուշադրությանը կներկայացնենք գործող ամբիոնի վարիչի մեկնաբանությունները՝ կատարվածի վերաբերյալ: Հավելենք, որ համալսարանականները զրպարտություն և հերյուրանք են որակել հրապարակումը: Այս առիթով հավելենք, որ առաջիկայում կանդրադառաննք նաև պատվիրատուների և պատվերն ընդունողների՝ այս հարցում անձնական շահագրգռություններին:

Շարունակելի

Գոհար Վեզիրյան