Արտակ Նազարյանի գործով վկան հրաժարվել է ցուցմունքից

2010 թվականի հուլիսի 27-ին Տավուշի մարզի «Մեհրաբ» զորամասում զոհված լեյտենանտ Արտակ Նազարյանի գործով այսօրվա դատական նիստի ժամանակ հարցաքննվել են երկու վկաներ, որոնցից մեկը' Արտակ Հովհաննիսյանը, այսօրվա նիստում իր ցուցմունք տալու ժամանակ, նշել է, որ ինքը չի մասնակցել որևէ քննչական գործողության, իսկ մյուսը' Ռաֆայել Էվոյանը, դատարանում պատմել է դեպքերի մասին, որոնք կապ չունեն իր նախաքննական ցուցմունքի հետ: Այս մասին դատական նիստից հետո Epress.am-ի հետ զրույցում ասել է տուժողի իրավահաջորդի ներկայացուցիչ, Հելսինկյան ասոցիացիայի ներկայացուցիչ Ռուբեն Մարտիրոսյանը:

«Արտակ Հովհաննիսյանը հրաժարվել է քրեական գործում առկա վեց արձանագրություններից: Դրանցից մեկում ասվում է, որ իբրև թե նա եղել է որպես ընթերակա, մյուսում գրված է, որ նա մասնակցել է Արտակ Նազարյանի իրերի, բջջային հեռախոսի հանձնմանը, մի այլ տեղում էլ գրված է, որ մասնակցել է այլ զինվորների բջջային հեռախոսների հանձնմանը: Սակայն ինչպես նա հայտնեց դատարանում, ինքը չի մասնակցել ոչ մի քննչական գործողության և տեղյակ չէ' ինչի մասին է գրել քննիչը, և նա չի ճանաչում քննիչին, որը կազմել է այդ արձանագրությունները», – տեղեկացրել է Ռուբեն Մարտիրոսյանը:
Մարտիրոսյանի խոսքով' վկա Ռաֆայել Էվոյանն էլ նշել է, որ ինքն այլ բան է պատմել, սակայն քննիչ Լևոն Պետրոսյանն իրեն ասել է' «գրի, որ ընթերցել ես, ստորագրի ու գնա ծառայության»:

Վկան դատարանում ասել է, որ այն, ինչ գրված է իր նախաքննական ցուցմունքում կեղծ է, և դրանք իր խոսքերը չեն:

Մարտիրոսյանը նաև տեղեկացրել է, որ մեղադրող դատախազ Հարություն Հարությունյանը վկայի այս հայտարարությունից հետո ասել է, որ «վկան երեք ամիս եղել է կալանքի տակ և հիմա գողական է գնում», այդ պատճառով սուտ ցուցմունք է տալիս:

Ռուբեն Մարտիրոսյանն էլ դատախազին պատասխանել է. «Քեզ էլ որ կալանավորեն, դու էլ գողական կգնաս: Քո տեղը կալնավայրն է, ոչ թե մեղադրողի աթոռը»:

Դատարանում վկան նաև հայտարարել է, որ Արտակ Նազարյանն ինքնասպան է եղել:

Երբ նրան հարցրել են, թե ինքը որտեղից գիտի, վկան պատմել է, որ իրեն այդ մասին ասել է քննիչ Պետրոսյանը' ցույց տալով մահացած Արտակ Նազարյանի լուսանկարները ու բացատրելով, որ դա ինքնասպանություն է եղել:

Այս ամենը հիմք ընդունելով' տուժող կողմը դատախազին ինքնաբացարկի միջնորդութուն է ներկայացրել: Դատավոր Սամվել Մարդանյանն այդ միջնորդության որոշումը կհայտնի հաջորդ դատական նիստի ժամանակ, որը նշանակել է մարտի 27-ին, ժամը 12 :00-ին:

«Ելնելով վկա Արտակ Հովհաննիսյանի ցուցմունքից' կարելի է ասել, որ նախաքննության ժամանակ առնվազն վեց կեղծ արձանագրություն են կազմել: Եվ վստահ ենք, որ հաջորդ դատական նիստերին նորանոր ապօրինություններ կբացահայտվեն: Քրեական գործի ցանկացած էջ բացելիս ստի ու կեղծիքի ենք ականատես լինում», – ասել է Ռուբեն Մարտիրոսյանը:

Հ.Գ. Ի դեպ, երբ մեղադրողներն ընթերցում էին վկա Ռաֆայել Էվոյանի նախաքննական ցուցմունքը, իսկ տուժող եւ պաշտպանական կողմերը հետեւում էին իրենց մոտ եղած պատճեններով, պարզվել է, որ պատճենները կողմերին հանձնելուց հետո նախաքննական գործի նյութերի բնօրինակում քննիչները փոխել են վկայի ցուցմունքում նշված ամսաթվերը:

Լուսանկարը՝ Արման Վեզիրյանի