Խաչատուր Սուքիասյանի դիմումը պետք է քննի ԸԸՀ-ն

Այսօր ԿԸՀ նիստում քննարկվել է Խաչատուր Սուքիասյանի մարտի 17-ին ներկայացրած դիմումը, որի արդյունքում որոշվել է մերժել վարչական վարույթ հարուցել Խաչատուր Սուքիասյանի դիմումի համաձայն՝ համապատասխան իրավասություն չունենալու հիմնավորմամբ։ Դա 10-րդ Ընտրատարածքային ընտրական հանձնաժողովի լիազորությունների սահմաններում է, ուստի դիմումը վերահասցեագրվել է ԸԸՀ-ին:

Հիշեցնենք, որ Խաչատուր Սուքիասյանը մեծամասնական համակարգով առաջադրվել էր թիվ 10 ընտրատարածքում։ Մարտի 14-ին վերջինիս տված ասուլիսից ՀՀ Ոստիկանության անձնագրային և վիզաների վարչությունը 15.05.2012 թվակիր գրությամբ անվավեր հայտարարեց մինչ այդ՝ Էրեբունու անձնագրային բաժանմունքի կողմից 03.03.2012թ. տրամադրած տեղեկանքը Խաչատուր Սուքիասյանի՝ վերջին 5 տարում Հայաստանում մշտապես բնակված լինելու մասով։ Վիզաների վարչությունը մեկ օրվա ընթացքում կատարած իր «փնտրտուքների» շնորհիվ պարզել է, որ Խ. Սուքիասյանը վեջին 5 տարվա ընթացքում Հայաստանից բացակայել է 10 ամիս 20 օր և համարում է, որ դրանով չի ապահովվում նրա՝ վերջին 5 տարում ՀՀ-ում մշտապես բնակված լինելու պահանջը։

Այս ամենից հետո Խաչատուր Սուքիասյանը դիմում էր ներկայացրել Հայաստանի Հանրապետության կենտրոնական ընտրական հանձնաժողով, Թիվ 10 ընտրատարածքային ընտրական հանձնաժողովի խնդրանքով ՀՀ ոստիկանության անձնագրային և վիզաների վարչության 15.03.2012թ. թիվ 25/01-15311 գրությունը հաշվի չառնել և սահմանված կարգով գրանցել Խաչատուր Սուքիասյանին, որպես պատգամավորի թեկնածու:

Օվսաննա Գևորգյան