Երեք ծառ կտրելու համար՝ 92.000 դրամ տուգանք

Ինչպես հայտնի է, Շիրակի մարզում ձմեռը երկարատեւ եվ խստաշունչ է: Վերջին տարիների ընթացքում գազի թանկացման հետ զուգահեռ Գյումրիում ավելացան նաեւ փայտի եւ քարածուխի վառարաններ օգտագործողների թիվը, շատերն էլ վերադարձել են հին ու բարի ավանդույթներին և գյուղացիներից ձեռք են բերում աթար:

ՀՀ օրենսդրության համաձայն՝ յուրաքանչյուր ոք, եթե այս կամ այն ձեւով վնաս է հասցնում շրջակա միջավայրին ու բնությանը, ենթարկվում է օրենքով սահմանված կարգով վարչական տույժի: Սոցիալապես ծանր պայմաններում ապրող Գյումրեցի Հակոբ Սուքիասյանը վերջերս կտրել էր հարեւանի տան տարածքում գտնվող երեք ծառ, ինչի հետանքով ենթարկվել է 92.000 դրամ տուգանքի: Հակոբ Սուքիասյանի խոսքերով՝ նրան նույն օրը հրավիրել են ոստիկանություն եւ համապասխան օրենքի շրջանակներում տուգանել:

Բնապահպանական տեսչությունից էլ իրեն տեղեկացրել են, որ տուգանքի 50.000 դրամը օրենքով սահմանված տույժն է, իսկ 42 հազար դրամը՝ բնությանը հասցված վնասը: Իսկ բնապահպանների պնդմամբ՝ այդ գումարը քաղաքացին պարտավոր է մուծել 15 օրյա ժամկետում, այլապես գործը կուղարկվի դատարան, քանզի ոչ ոք իրավունք չունի առանց համապատասխան թույլտվության ծառ կտրել եւ վնաս պատճառել բնությանը: Սուքիասյանը, սակայն, նման քայլի է դիմել՝ ելնելով ծանր սոցիալական վիճակից:

«Եթե այդքան գումար ունենայի, ծառերը չէի կտրի ու չէի հայտնվի նման ամոթալի իրավիճակում»,- ասում է նա: 

Հատկանշական է, որ երբ խոսքը վերաբերում է ոչ թե շարքային քաղաքացուն, այլ հայրենի օլիգարխներին և նրանց հովանավորության տակ գտնվող ընկերություններին, իրավապահներն ամենևին չեն հիշում ՀՀ օրենսդրության և դրա պահանջների մասին: