SAS-ի աշխատակիցը չի ցանկացել Հանրապետականների համար պարտադրաբար ձայներ հավաքել

Վերջերս Լուրեր.com-ը նյութ էր հրապարակել SAS սուպերմարկետում տիրող իրավիճակի վերաբերյալ, որտեղ աշխատակիցներին ստիպում են ձայներ հավաքել ՀՀԿ անդամ, SAS-ի սեփականատեր Արտակ Սարգսյանի և Հանրապետական կուսակցության օգտին։ Աշխատակիցներից յուրաքանչյուրը պետք է խանութի մենեջերին ներկայացնի 5-ական մարդու անձնական տվյալ՝ անուն–ազգանուն, հեռախոսահամար, անձնագրային տվյալներ և ստորագրություն։ Լուրեր.com-ին հաջողվեց կապվել ցանցի աշխատակիցներից մեկի հետ, որը դուրս էր եկել աշխատանքից՝ չցանկանալով կատարել այդ պահանջը։ Մեր զրուցակիցը հասկանալի պատճառներով խնդրել է չհրապարակել իր անունը։

Որքա՞ն ժամանակ եք աշխատել SAS–ում։

SAS-ում աշխատել եմ մոտ երեք ամիս։

Իսկ ինչո՞ւ եք դուս եկել աշխատանքից։

Դե, այնտեղ ասում էին, որ Հանրապետականների համար պետք է ձայն հավաքեմ, ես էլ սեր չունեմ քաղաքականության հետ։

Իսկ ավելի մանրամասն չէ՞ք կարող ասել՝ ի՞նչ էին ձեզանից պահանջում։

Կոնկրետ ուզում էին, որ ամեն աշխատող մինիմում երկու հոգի տանի։

Տանել ասելով ի՞նչ նկատի ունեք։

Նկատի ունեմ, որ մինիմում երկու հոգի Արաբկիրի ընտրատածքից պետք է ընտրող տանի Հանրապետականին՝ կոնկրետ Արտակ Սարգսյանին։

Այսինքն՝ պետք է այդ երկու հոգու տվյալնե՞րը ներկայացնեիք։

Հա, տվյալները պետք է տանեինք, ու բացի դրանից՝ ընտրություններից հետո ապացուցեինք, որ քվեարկել են. հեռախոսով քվեաթերթիկը նկարեն, որ ընտրել են Արտակ Սարգսյանին, իսկ համամասնականով՝ Հանրապետականին։ Մի մեթոդը ճշտելու՝ դա է, որ Հանրապետականին ընտրող երկու հոգի ունեցել ես ։

Այսինքն՝ այն մարդիկ, որոնց դուք ներկայացնում եք, նաև պետք է ապացուցեի՞ն, որ քվեարկել են իրենց ասված ձևով։

Դե հա էլի, որ հետո չտացվի, որ ուղղակի անուններն ենք տվել։ Պետք է ապացուցեիր, որ քո տարած մարդը իրենց է ընտրել։

Ձեր ներկայացրած մարդկանց գրանցելու գործը ովքե՞ր էին կարգավորում։

Դե, Արտակ Սարգսյանը եկավ խոսաց, ՍԱՍ–ի տնօրենը՝ Սահակյանն էլ։ Պարբերաբար ժողովներ են լինում, չէին կարա բոլորին հավաքեին, մի քանի անգամ տարբեր խանութների աշխատակիցներին հավաքել՝ ժողով են կազմակերպել։ Ու իրանը մենակ եդ «ՍԱՍ Գրուպ»–ը չի։ Debenhams, Palermo, Aldo, Next, Cavalini... Սաղ իրանն ա։ Էտ բոլոր աշխատակիցներից ամեն մեկը որ երկու հոգի տանի, մի–մի հոգի էլ իրենք են, էտ արդեն մեծ քանակ է կազմում։ Ու բացի դրանից, ասում էին, որ եթե ազդեցիկ, անունով ծանոթ ունեն այդ ընտրատարածքում, որ իրանք կարան մարդ բերեն մեր համար, եթե կարողանաք այդպիսի մարդկանց հետ մեզ ծանոթացեք, միջնորդեք, ձեզ համար ավելի լավ կլինի։

Իսկ ի՞նչ էին ձեզ խոստանում դրա փոխարեն։

Դրա փոխարեն ոչ մի բան չէին խոստանում։ Խոստանում էին այն դեպքում, երբ շատ մարդ ես կարողանում տանել։ Ասում էին՝ լավ կլինի, բալային սիստեմ ինչ–որ, չգիտեմ, ես շատ չխորացա՝ երկու օրից դուրս եկա էտ ամեն ինչից։

Շատ մարդիկ կա՞յին, որ ուզում էին դուրս գալ աշխատանքից կամ իրենց դուր չէր գալիս այդ վիճակը։

Շատ մարդը չեմ կարող ասել, կոնկրետ մեր խանութից մենակ ես եմ դուրս եկել։

Իսկ երբ են ձեզանից սկսել պահանջել, որ մարդկանց գրանցեք։

Հունվարի մեջ էր։