Դադարեցվել է վրացական գինիների արտահանումը Ռուսաստան

Վրաստանի «Շումխան ուայնս» գինեգործական ընկերության 100 հազար շիշ գինով բեռնված 10 բեռնատար ներկայումս կանգնեցված է: Ինչպես տեղեկացնում է «Արմենպրես»-ը՝ հղում անելով ընկերության գլխավոր տնօրեն Նուցա Աբրամիշվիլիին, դրա պատճառն այն է, որ ռուբլու արժեզրկման պատճառով սահմանափակվել է արտարժույթի փոխանցումը Ռուսաստանի սահմաններից դուրս:

«Ռուսաստանից մեզ ուղարկել են ակցիզային դրոշմանիշները, որոնք արդեն փակցված են շշերի վրա, փաստորեն արտադրանքը վաճառվել է: Բայց ելնելով այն բանից, որ ապրանքի բեռնումը տեղի է ունենում կանխավճարի դեպքում, իսկ տնտեսական ճգնաժամի պատճառով սահմանափակված է արժույթի փոխանցումն արտասահման, ապա մենք հարկադրված ենք դադարեցնել արդեն դրոշմավորված ապրանքը»,- հայտարարել է Աբրամիշվիլին:

Նրա խոսքով՝ բեռնումը պետք է վերսկսվի փետրվարին, բայց նկատի ունենալով Ռուսաստանի անկայուն իրադրությունը, ոչ մի երաշխիք չկա, որ խնդիրը կկարգավորվի, իսկ ապրանքը կուղարկվի գործընկերներին:

Ինչպես նշում է «Գրուզիա Online»-ը, «Ասկանելի» ընկերության հիմնադիր Ջիմի Չխաիձեի խոսքով՝ ռուբլու փոխարժեքի անկայունության պատճառով գինու արտահանումը Ռուսաստան դադարեցված է. մասնավորապես, ընկերությունը 2015 թվականի հունվարին պատվերներ չի ունեցել:

Նույն բանն է ասում նաև «Թբիլգինի» ընկերության ղեկավար Գեորգի Մարգվելաշվիլին: Նրա խոսքով՝ դեկտեմբերին ընկերությունն ուղարկել է մեծ խմբաքանակի գինի, իսկ հունվարին ոչ մի պատվեր չի ստացել: