Մերկելը նշել է եվրագոտո՝ ճգնաժամից դուրս գալու ուղիները

Եվրագոտում պարետային ճգնաժամը հաջողվել է վերցնել վերահսկողության ներքո, բայց այն տակավին հաղթահարված չէ: Այդ մասին, ինչպես տեղեկացնում է «Արմենպրես»-ը, հայտարարել է Գերմանիայի կանցլեր Անգելա Մերկելը՝ ելույթ ունենալով Դավոսի Համաշխարհային տնտեսական համաժողովում: Ամենից առաջ Եվրոպան մինչ օրս չի վերադարձրել վստահությունն իր մրցունակության նկատմամբ, ասել է նա:

Մերկելի խոսքով՝ Եվրոպայի երկրները պետք է նոր աշխատատեղեր ստեղծեն այնպիսի ոլորտներում, ինչպիսիք են թվային տեխնոլոգիաները, հաղորդել է Deutsche Welle-ն:

Ինչպես ընդգծել է Գերմանիայի կանցլերը, եվրագոտու զարգացման պատասխանատվությունը կրում են քաղաքական գործիչները: «Մեզ անհրաժեշտ է դեպի տնտեսական աճը կողմնորոշված, կշռադատված տնտեսական քաղաքականություն»,- ասել է նա:

«Ինտերֆաքս»-ի հաղորդմամբ՝ Գերմանիայի փոխկանցլեր, Սոցիալ-դեմոկրատական կուսակցության առաջնորդ Զիգմար Գաբրիելը Եվրամիության երկրներին կոչ է արել ավելի վճռականորեն ձեռնամուխ լինել կառուցվածքային բարենորոգումներին: Գաբրիելը նաև նշել է, որ Գերմանիայի կառավարությունը բարձր է գնահատում Եվրահանձնաժողովի կողմից պատրաստված բազմամիլիարդանոց ներդրումային ծրագիրը:

Ավելի վաղ հայտնի է դարձել, որ Եվրոպայի կենտրոնական բանկը 2015 թվականի մարտից ձեռնամուխ կլինի երկրորդային շուկայում ամսական մինչև 60 միլիարդ եվրո գումարի ակտիվների գնմանը և կշարունակի այն մինչև գնաճի կայուն բարելավումը կամ էլ մինչև 2016 թվականի սեպտեմբերի վերջը: