Լատվիան մտադիր է փոփոխություններ կատարել «Արևելյան գործընկերության» ծրագրում

Լատվիան մտադիր է Եվրամիության խորհրդում իր նախագահության ժամանակաշրջանում զգալի փոփոխություններ մտցնել «Արևելյան գործընկերության» ծրագրում: Այդ մասին, ինչպես տեղեկացնում է «Արմենպրես»-ը, հայտարարել է Լատվիայի արտաքին գործերի պետական քարտուղար Անդրեյս Պիլդեգովիչսը:

Ընթացիկ տարվա հունվարի 1-ից Լատվիան դարձել է ԵՄ-ի խորհրդի նախագահ:

«2015 թվականին հարկ է, որ մենք և՛ Եվրամիության, և՛ գործընկերների հետ վերաիմաստավորենք ծրագիրը»,-ասել է Պիլդեգովիչսը:

«Եթե սկզբնապես այն մտահղացվել էր որպես Եվրամիությանն անդամակցելուն գործընկերներին մոտեցնելու հարթակ, ապա ապագայում գուցե մեզ հարկավոր է ծրագիրը դարձնել ավելի ինկլյուզիվ և այն ավելի համապատասխանեցնել բոլոր գործընկերների շահերին»,-պարզաբանել է պետքարտուղարը:

Նա հավելել է, թե հարկավոր է «Արևելյան գործընկերության» ծրագիրն ավելի մոտեցնել յուրաքանչյուր պետության շահերին:

Ինչպես նշում է ՌԻԱ Նովոստին, ավելի վաղ ՌԴ-ում Լատվիայի դեսպան Աստրա Կուրմեն հայտարարել է, որ «Արևելյան գործընկերության» երկրների հետ ԵՄ-ի համագործակցության ամրապնդումը Լատվիայի գերակայություններից մեկը կդառնա ԵՄ-ում նախագահության ժամանակաշրջանում:

«Արևելյան գործընկերությունը» Եվրամիության ծրագիրն է, որը նպատակամղված է նախկին ԽՍՀՄ-ի վեց պետությունների հետ քաղաքական և տնտեսական մերձեցմանը: Ծրագրին մասնակցում են Վրաստանը, Մոլդովան, Ադրբեջանը, Հայաստանը, Բելառուսը և Ուկրաինան: