Երիտասարդ ամերիկուհին ազատազրկվել է ԻՊ-ին միանալու մտադրության համար

ԱՄՆ-ում դատարանը 19-ամյա աղջկան դատապարտել է 4 տարվա ազատազրկման՝ «Իսլամական պետություն» ահաբեկչական խմբավորմանն օգնելու փորձի համար: Այս մասին հաղորդում է Agence France-Presse-ը:

Շենոն Քոնլին մեղավոր է ճանաչվել ԻՊ-ին և այլ ծայրահեղական խմբերի՝ ներառյալ «Ալ-Քաիդա»-ին, ֆինանսական օգնություն ցուցաբերելու փորձի համար:

Աղջիկը համացանցով ծանոթացել է տղամարդու հետ, ով հայտնել է, թե Սիրիայում խմբավորման անդամ է: Քոնլին և ենթադրյալ գրոհայինը նշանադրվել են աղջկա՝ ռազմական գործողությունների գոտի ուղևորությունը կազմակերպելու նպատակով:

Նրա խոսքով՝ տղամարդու հետ շփումից հետո ինքը ջիհադին մասնակցելու ցանկություն է զգացել: Նա անցել է բոլոր հնարավոր մարզումները և նույնիսկ սովորել US Army Explorers կադետական ծրագրով:

Շենոն Քոնլիի՝ ԻՊ-ի շարքեր մտնելու ծրագրերի մասին իմացել են FBI-ում: Նրանք աղջկան բազմիցս նախազգուշացրել են նման գործողությունների համար պատասխանատվության մասին, այնուամենայնիվ, վերջինս որոշել է Սիրիա մեկնել: Աղջկան ձերբակալել են Դենվերի օդանավակայանից Թուրքիա թռչելու փորձի ժամանակ: