Հունաստանի ձախ արմատական ուժերի կոալիցիան հաղթանակ է տարել խորհրդարանական ընտրություններում

Հունաստանի ձախ արմատական ուժերի կոալիցիան (ՍԻՐԻԶԱ) հաղթանակ է տարել խորհրդարանական ընտրություններում: Ընտրական քվեաթերթիկների 94,22 տոկոսի հաշվման արդյունքում այն ստանում է ձայների 36,37 տոկոսը, ինչը 149 տեղ Է ապահովում 300-տեղանոց միամանդատ խորհրդարանում: Մինչդեռ ՍԻՐԻԶԱ-ին 151 կամ ավելի տեղ է անհրաժեշտ իր օրինագծերը գլխավոր օրենսդիր մարմնում անցկացնելու համար, տեղեկացնում է «Արմենպրես»-ը:

Վարչապետ Անտոնիս Սամարասի «Նոր ժողովրդավարություն» աջ կենտրոնամետ կուսակցությունը հավաքում է ձայների 27,81 տոկոսը (76 տեղ): Երրորդ տեղում ծայրահեղ աջ «Խրիսի Ավգի» («Ոսկե արշալույս») կուսակցությունն է՝ 6,29 տոկոս ձայներով (17 տեղ), չորրորդում՝ «Պոտամի»-ն («Գետ»)՝ 6,04 տոկոս ձայներով (17 տեղ): 5,49 տոկոս ձայներով (15 տեղ) նրան հաջորդում է Հունաստանի Կոմկուսը, «Անկախ հույները» (4,73 տոկոս, 13 տեղ) եւ Համահունական սոցիալիստական շարժումը (ՊԱՍՕԿ) (4,66 տոկոս, 13 տեղ): Ձայների վերջնական հաշվարկից հետո պատկերի արմատական փոփոխումը քի չ հավանական է:

Ըստ ՏԱՍՍ-ի հաղորդման՝ փորձագետներն այն կարծիքին են, որ առայժմ միայն «Անկախ հույներն» են հարմար ՍԻՐԻԶԱ-ին հնարավոր համագործակցության համար:

Ինչպես տեղեկացնում է Reuters գործակալությունը, Անտոնիս Սամարասն ընդունել է իր պարտությունը խորհրդարանական ընտրություններում եւ հաղթանակի առթիվ շնորհավորել ՍԻՐԻԶԱ-ի առաջնորդ Ալեքսիս Ցիպրասին:

«Հույն ժողովուրդն ասաց իր խոսքը եւ մենք հարգում ենք նրա որոշումը»,- հայտարարել է Սամարասը հեռուստատեսային ելույթի ընթացքում: Նա խոստացել է, որ իր կուսակցությունը վճռորոշ դեր կխաղա խորհրդարանում եւ կշարունակի եվրոպական քաղաքականությունը:

40-ամյա Ալեքսիս Ցիպրասը, Աթենքի կենտրոնում ելույթ ունենալով իր հազարավոր կողմնակիցների առջեւ, ասել է, որ Հունաստանը հունվարի 26-ից չեղյալ է հայտարարում խիստ խնայողության միջոցառումները: «Հունաստանը շրջում է էջը՝ անցյալում թողնելով խիստ խնայողության միջոցառումներն ու ստորացումների հինգ տարին: Հունաստանն լավատեսությամբ, հույսով, արժանապատվությամբ, կայուն քայլերով առաջ է գնում դեպի Եվրոպա, որը փոխվում է»,- ասել է նա:

Հունաստանը եւ ՍԻՐԻԶԱ-ն, հույն ժողովուրդը. ահա փոխվող Եվրոպայի օրինակը, ընդգծել է Ցիպրասը:

«Այսօր մեզ մոտ տոն է, իսկ վաղը մենք ծանր աշխատանք ենք սկսում,- հավելել է քաղաքական գործիչը:- Ներկայիս ընտրություններում ժողովրդի ազատ կամաարտահայտումը միանշանակ վերջ դրեց խիստ խնայողության միջոցառումների արատավոր շրջանին: Այն միանշանակ չեղարկեց աղետալի հուշագրերը (վարկերի դիմաց խիստ խնայողության միջոցառումների վերաբերյալ): Այդ ժողովրդական կամաարտահայտումն անցյալում թողեց միջազգային վարկատուների «եռյակին» (ԵՄ, ԵԿԲ եւ ԱՄՀ)»:

Ֆրանսիայի նախագահ Ֆրանսուա Օլանդը շնորհավորական հեռագիր է հղել ՍԻՐԻԶԱ-ի առաջնորդ Ալեքսիս Ցիպրասին:

«Հանրապետության նախագահը հիշեցնում է Ֆրանսիային եւ Հունաստանին միավորող բարեկամության մասին եւ հավաստում է երկու երկրների միջեւ սերտ համագործակցությունը շարունակելու պատրաստակամությունը՝ նպատակ ունենալով աճի եւ կայունության ապահովումը եվրոյի գոտում»,- ասված է Ելիսեյան պալատի հաղորդագրության մեջ:

Մեծ Բրիտանիայի վարչապետ Դեւիդ Քեմերոնը կարծիք է հայտնել, որ Հունաստանում կայացած վաղաժամկետ ընտրությունների արդյունքը տնտեսական անորոշությամբ է սպառնում Եվրոպային:

«Հունաստանի ընտրությունները կմեծացնեն տնտեսական անորոշությունն ամբողջ Եվրոպայում: Ուստի Միացյալ Թագավորությունը պետք է առաջնորդվի սեփական ծրագրով՝ ապահովելով իր անվտանգությունը»,- Քեմերոնի խոսըք մեջբերել է Reuters գործակալությունը: