Նիկոլ Փաշինյանի նամակը՝ Սամվել Նիկոյանին

Այսօր առավոտյան, ՀԱԿ ներկայացուցիչ, «Հայկական ժամանակ» օրաթերթի գլխավոր խմբագիր Նիկոլ Փաշինյանը նամակ է հղել ԱԺ նախագահ Սամվել Նիկոյանին: Նամակն ամբողջությամբ ներկայացնում ենք ստորև.

«Պրն. Նիկոյան, Երևանի թիվ 7 ընտրատարածքի մանդատով Ազգային Ժողովի պատգամավոր համարվող Սամվել Ալեքսանյանը չորրորդ գումարման Ազգային Ժողովի գոյության ընթացքում գումարված բոլոր տասը հերթական նստաշրջանների քվերակությունների կեսից ավելիից բացակայել է: ՀՀ ԱԺ կանոնակարգ օրենքի տրամաբանությամբ՝ չորրորդ գումարման Ազգային Ժողովի գործունեության ընթացքում Սամվել Ալեքսանյանն առնվազն տասն անգամ պետք է զրկվեր պատգամավորական մանդատից: Մինչև օրս, սակայն, Ալեքսանյանը պահապանում է մանդատը: ԱԺ կանոնակարգ օրենքի տրամաբանությամբ՝ եթե նա չի զրկվում պատգամավորական մանդատից, նշանակումբ է՝ վերջին հինգ տարվա մեծ մասը անաշխատունակ է եղել, դրա մասին ներկայացրել է համապատասխան փաստաթուղթ՝ անաշխատունակության թերթիկ կամ էլ ԱԺ նախագահը նրա բացակայությունները համարել է հարգելի՝ որևէ այլ պատճառով, ինչպես նախատեսված է ՀՀ ԱԺ օրենքի՝ հոդված 99-ով: Հաշվի առնելով տվյալ հարցի բացառիկ հանրային նշանակությունը՝ պահանջում եմ ինձ՝ որպես Երևանի թիվ 7 ընտրատարածքում առաջադրված ԱԺ պատգամավորի թեկնածու, ներկայացնել այն հիմքերը, որով Սամվել Ալեքսանյանի բացակայությունները անհարգելի չեն համարվում: Համոզված եմ, որ տվյալ խնդրի ուսումնասիրության համատեքստում կարող են ի հայտ գալ կոռուպցյոն երևույթներ, որով մտադիր եմ իմ իրավասությունների շրջանակներում օրենքով նախատեսված ընթացք տալ:

Կանխավ շնորհակալաություն»: