Այն, ինչ ասվել էր զեկույցում, գտնում եմ՝ ճիշտ է. Պարգև Օհանյանը՝ ՄԻՊ զեկույցի մասին

Արդարադատության նախարարության գործունեության ոլորտում առկա թերությունների և խնդիրների մասին այսօր ՀՀ մարդու իրավունքների պաշտպան Կարեն Անդրեասյանը զեկույց էր հրապարակել: Զեկույցը կազմվել էր ՀՀ մարդու իրավունքների պաշտպանին հասցեագրված բողոքների, օրենսդրության վերլուծության, մամուլի արժանահավատ և չհերքված հրապարակումների, միջազգային և տեղական կազմակերպությունների զեկույցների, ինչպես նաև ոլորտի մասնագետների ու իրավապաշտպանների հետ հարցազրույցների արդյունքում ստացված տեղեկությունների հիման վրա:

Թե որքանով են տեսանելի դրական արդյունքներն Արդարադատության նախարարության գործունեության ոլորտում, փորձեցինք ճշտել նախկին դատավոր Պարգև Օհանյանից:

«Ես ինչպես հասկանում եմ, օմբուդսմենը դեռ այնքան էլ փորձառու չէ, նախ երիտասարդ է, հետո էլ՝ չի եղել մեր խոհանոցներում, նկատի ունեմ իրավապահ մարմիններում չի աշխատել, թեև չեմ հիշում որտեղ է աշխատել: Բայց թիմը լավն է. այն, ինչ ասվել էր զեկույցում, գտնում եմ՝ ճիշտ է»,– մեկնաբանելով ՄԻՊ զեկույցը՝ ասաց Պարգև Օհանյանը և հավելեց, որ դրանք ցավալի փաստեր են և «հարց է, թե դրանք որքանով են օբյեկտիվ կամ սուբյեկտիվ»:

Անդրադառնալով ՄԻՊ զեկույցում նշված ԴԱՀԿ ծառայության անգործությանը պետական մարմինների նկատմամբ՝ պաշտոնատար անձանց կողմից վճռի պահանջները չկատարելու դեպքերին Օհանյանն ասաց. «Դատավճիռները չկատարելը դա ուղղակի խայտառակություն է, առավել ևս, որ դրա համար քրեական պատասխանատվություն կա: Այսինքն, քրեական օրենսգրքում նախատեսված է պատիժ այն պաշտոնատար անձանց նկատմամբ, ովքեր վճիռը չեն կատարի»:

Դատավարությունների մասին խոսելիս մեր զրուցակիցը նշեց, որ ձգձգվում է ոչ միայն կատարումը, ձգձգվում են հենց դատաքննությունները, նախաքննական պրոցեսը:

Օհանյանի խոսքերով՝ նախաքննություն կոչվածի մասին շատ է խոսվում, դա ավելորդ մի փուլ է: Ամիսներ շարունակ մարդկանց նկատմամբ ապօրինի հետապնդում է իրականացվում այն դեպքում, երբ զարգացած ոչ մի երկրում նման բան չկա: Հետաքննություն կա և դատաքննություն, նախաքննություն չկա:

«Երբեմն հասարակ գործը, ասենք թեկուզ գողությունը, որ կարող է շատ կարճ տևել, երկար ամիսներ է տևում, ի՞նչ են անում չեմ հասկանում: Այդ պատճառով տուժում են բոլորը, և՛ տուժողը, և՛ մեղադրյալը, և՛ վկաները, և՛ պետությունը, և՛ հասարակությունը»,- նշեց նա:

Նախկին դատավորը, անդրադառնալով զեկույցում նոտարական ծառայությունների համար քաղաքացիներից պահանջված տարբեր չափի վճարումներին, ասաց. «Ցավոք կա այդ երևույթը: Դրա անունը կաշառք կդնենք, թե ավելի մեղմ կասենք, ինչպես այդտեղ է ասված, ցավոք դրանք կան: Իզուր չէ, որ ամենաբարձր պաշտոնյաները իրենց երեխաներին հատկապես նոտարներ են դարձնում»:

Օհանյանը նաև նշեց, որ միանշանակ համաձայն է զեկույցում ասված ոլորտի դրական զարգացումներին, կապված նոտարների նկատմամբ վերահսկողության սահմանմանը, ինչպես նաև նոտարի պաշտոնում նշանակվելու, նոտարի թեկնածուների վերապատրաստման նոր կարգ և չափանիշներ սահմանելուն, բայց և հավելեց. «Դրական բաներ շատ չեն անում, հատկապես նախընտրական պատրվակով թող անեն»:

Օհանյանը, խոսելով առկա խնդիրների և մի շարք գործընթացների մասին, որոնք գտնվում են բարձիթողի վիճակում, ասաց. «Այլ հարց է, որ մենք մի ծայրահեղությունից մյուս ծայրահեղությունն ենք ընկնում: Մենք սկզբից թույլ ենք տալիս սխալներ, տարիներ շարունակ լռում ենք կամ տեսնում ենք՝ չտեսնելու ենք տալիս, մեկ էլ միանգամից դնում աղբյուրը կտրում ենք՝ չուտե՛ս, չխմե՛ս, չշնչե՛ս: Չգիտեմ, դա էլ ճիշտ չէ, դա էլ կարող է բերել ինչ-որ պառալիզացման՝ տնտեսության և իրավական ոլորտում: Ինչևէ պետք է միջոցներ ձեռնարկեն և կարգավորեն, բարձիթողի վիճակում են շատ գործընթացներ»:

Գայանե Համբարձումյան