Վլադիմիր Գասպարյանը կրկին կոչ արեց հավատարիմ լինել ոստիկանի օրինապահ եւ մարդասեր առաքելությանը

Մարտի 20-ին ՀՀ ոստիկանության պետ, գեներալ-լեյտենանտ Վլադիմիր Գասպարյանը աշխատանքային հանդիպում ունեցավ ոստիկանության Կազմակերպված հանցավորության դեմ պայքարի գլխավոր վարչության անձնակազմի հետ:

Կարեւորելով ստորաբաժանման դերը կազմակերպված հանցավորությանը դիմակայելու գործում՝ Վլադիմիր Գասպարյանն ընդգծեց, որ այդ պատասխանատու ոլորտում հաջողության գրավականը արդիական ստորաբաժանման ձեւավորումն է, որը պատրաստ կլինի արձագանքելու հանցավորության բոլոր մարտահրավերներին:

Ոստիկանության պետը ստորաբաժանման արդիականացման խնդրի հետ կարեւորեց նաեւ բարոյահոգեբանական մթնոլորտի եւ աշխատանքային մեթոդների վերափոխման անհրաժեշտությունը, ինչը չափազանց կարեւոր է հասարակության հավատի ամրապնդման, ոստիկան-քաղաքացի փոխգործակցության ու փոխադարձ վստահության ընդլայնման տեսանկյունից: Ստորաբաժանումը պետք է զբաղվի կարեւորագույն գործերով, շեշտեց Վլադիմիր Գասպարյանը, եւ, ամենագլխավորը, նորովի աշխատի մարդկանց հետ:

Վլադիմիր Գասպարյանը ներկայացնելով իր մոտեցումները՝ նշեց, որ բարեփոխումներն արմատական են լինելու՝ սկսած ստորաբաժանման անվանումից, ինչը ենթադրում է գործունեության նոր բովանդակային ընկալում, մինչեւ կառուցվածքային փոփոխությունները, կադրային համալրումը, տեխնիկական վերազինումը եւ այլն:

Ներկայացնելով ստորաբաժանման կառուցվածքային փոփոխությունները՝ ոստիկանության պետը հանդիպման մասնակցներին կոչ արեց վերանայել իրենց վերաբերմունքն աշխատանքին, աշխատանքային մեթոդներին ու սկզբունքներին:

Վլադիմիր Գասպարյանը ստորաբաժանման ղեկավարներին հանձնարարեց համալրումն իրականացնել պրոֆեսիոնալ ու փորձառու կադրերով, անմիջաբար աշխատել անձնակազմի հետ, ուշադիր լինել ենթակաների կարծիքի հանդեպ եւ կիրարկել այն առաջարկները, որոնք կնպաստեն ընդհանուր գործի հաջողությանը:

Ամփոփելով հանդիպումը՝ ոստիկանության պետ, գեներալ-լեյտենանտ Վլադիմիր Գասպարյանը կրկին կոչ արեց հավատարիմ լինել ոստիկանի օրինապահ եւ մարդասեր առաքելությանը, սրբորեն պահպանել ոստիկանի կյանքի եւ գործի գլխավոր սկզբունքները: