Գյուլենը պաշտպանում է հայերին. Դավութօղլուի հիվանդ երևակայությունը

Թուրքիայի վարչապետ Ահմեթ Դավութօղլուն հանդես է եկել հերթական հակահայկական սադրիչ հայտարարությամբ:

Ինչպես հաղորդում է «Արմենպրես»-ը՝ վկայակոչելով թուրքական հանրային հեռուստաալիքի TRT Haber կայքը, Դավութօղլուն հայտարարել է, որ Ֆաթուլլահ Գյուլենի շարժումը հայկական լոբբին օգտագործում է Թուրքիայի վրա ճնշում գործադրելու համար: Նրա խոսքով' շարժման առաջնորդը և նրա կողմնակիցները հակաթուրքական քարոզչություն են տանում ԱՄՆ-ում:

«Վերջերս Գյուլենը հայտարարել էր, որ Թուրքիայում ոչ մահմեդականների, այդ թվում՝ հայերի իրավունքները ոտնահարվում են, ինչը բխում է հայկական լոբբիի շահերից», -ասել է Դավութօղլուն՝ նշելով, որ նման հայտարարությունը պատահական չէ, եթե հաշվի առնվի, որ ապրիլի 24-ին նշվելու է Հայոց ցեղասպանության 100-ամյա տարելիցը:

Գյուլենին թշնամի հայտարարած Թուրքիայի Նախագահ Ռեջեփ Թայիփ Էրդողանի կամակատար Դավութօղլուի այդ հայտարարությունը դուրս է տարրական մարդկային տրամաբանության սահմաններից: Էրդողանի մերձավորների, այդ թվում որդու, դստեր, փեսայի, ինչպես նաև Թուրքիայի կառավարության անդամների միլիարդավոր դոլարների հասնող կոռուպցիոն գործարքները բացահայտման համար «գյուլենականներին» մեղադրող և հետապնդող այդ երկրի իշխանությունները թուրքական հասարակության առաջ իրենց կեղտոտ գործերը կոծկելու համար այժմ էլ մեղադրում են հայկական սփյուռքին:

Թուրք կրոնական գործիչ Ֆաթուլլահ Գյուլենը հայտնի է իսլամի իր չափավոր մեկնաբանությամբ: Գյուլենը նախկինում եղել է Էրդողանի դաշնակիցը, սակայն նրանց հարաբերությունները փչացել են 2013 թվականի դեկտեմբերին Էրդողանի մերձավոր շրջապատի անդամների աղմկալից կոռուպցիոն բացահայտումներից հետո, ինչում Թուրքիայի առաջնորդը մեղադրել է Գյուլենի հետևորդներին: Այժմ Էրդողանը փորձում է հասնել ԱՄՆ-ից Գյուլենի արտահանձնմանը, որտեղ նա բնակվում է 1998 թվականից: Գյուլենն, իր հերթին, դարձել է Էրդողանի առավել նշանակալի քննադատներից մեկը: