Ալեքսանդր Մանասյանն ըմբռնումով է մոտենում դեպի Արցախ ավտոերթին, սակայն ոչ համախոհությամբ

Քաղաքագետ Ալեքսանդր Մանասյանն ըմբռնումով է մոտենում դեպի Արցախ ավտոերթի կազմակերպիչների նախաձեռնությանը, սակայն ոչ համակրանքով և համախոհությամբ:

Փետրվարի 11-ին լրագրողների հետ հանդիպմանը քաղաքագետն ընդգծեց, որ ըմբռնումով է մոտենում այդ նախաձեռնությանը, քանի որ երկրում առկա են խնդիրներ, որոնցով համակված է ամեն հայ: «Ես այն կարծիքին եմ, որ այդ ավտոերթի մասնակիցների մեծ մասը գնացել են այդ քայլին անկեղծ, հայրենասիրական մղումներով: Չեմ կարող ասել, որ բոլոր մասնակիցները, որովհետև չեմ կարող բոլորի փոխարեն երաշխավորել: Վստահ չեմ կարող լինել, որ երթի բոլոր մասնակիցները միացել են նախաձեռնությանը ազնիվ, հայրենասիրական մղումներով»,- «Արմենպրես»-ի հաղորդմամբ՝ նշեց Մանասյանը:

Նա ընդգծեց, որ որքան էլ ըմբռնումով է մոտենում դեպի Արցախ ավտոերթով գնալու նախաձեռնությանը, ինքն այդ ավտոերթին չէր մասնակցի: «Չէի մասնակցի, որովհետև գտնում եմ, որ ցանկացած քաղաքական շարժում ասպարեզ պետք է իջնի հստակ հայեցակարգով, որոշակի տեսությամբ, սոցիալական և քաղաքական իրողությունների իմաստավորման, գիտական տեսլականի հիմնավորումներով: Իսկ տվյալ դեպքում ես այդ հայեցակարգը չեմ տեսել: Չի եղել նման հայեցակարգ, որովհետև եթե լիներ, ես առաջինից մեկն էի իմանալու դրա մասին»,- նշեց Մանասյանը:

Նա ընդգծեց, որ Արցախից նոր է վերադարձել՝ հավելելով, որ այնտեղ բոլորն ափսոսանքով են խոսում Բերձորում տեղի ունեցած տհաճ միջադեպի մասին: Նրա խոսքով՝ ողջ հայությունն է այդ մասին ափսոսանքով խոսում, որովհետև որևէ մեկի համար ցանկալի չէ, որ հայերի միջև նման դեպքեր լինեն: