«Ժառանգությունը» մեծ ակնկալիքներ ունի ԱՄՆ նոր դեսպանից

«Ժառանգություն» կուսակցության փոխնախագահ Արմեն Մարտիրոսյանը հույս ունի, որ ԱՄՆ նորանշանակ դեսպան Ռիչարդ Միլսն ակտիվ գործունեություն կծավալի Հայաստանում և ԱՄՆ քաղաքականությունը կտարածի այստեղ: ԱՄՆ քաղաքականություն ասելով' Մարտիրոսյանը նկատի ունի առաջին հերթին ժողովրդավարության ամրապնդման համար դաշտի ստեղծումը: «Մեծ ակնկալիքներ կան ԱՄՆ դեսպանից և դեսպանատնից: Հուսով եմ՝ համատեղ քայլեր կձեռնարկվեն առաջին հերթին ժողովրդավարության ամրապնդման համար: Համատեղ քայլեր ասելով' նկատի չունեմ իշխանափոխությունը, դա մեր ներքին խնդիրն է, և մենք ինքներս այն պետք է կարողանանք լուծել»,- «Արմենպրես»-ի փոխանցմամբ փետրվարի 11-ին կայացած հանդիպման ժամանակ ասաց Արմեն Մարտիրոսյանը' հավելելով, թե հույս ունի, որ նախկին դեսպան Հեֆերնի ցանկություններն ու ծրագրե րը կյանքի կկոչվեն:

Անդրադառնալով ԱՄՆ դեսպանի հայտարարությանը, թե Հայաստանում իրենց համար առաջնահերթ կարևորություն ունեն ԼՂ հակամարտության կարգավորումը, սահմանային անվտանգությունն ու Հայոց ցեղասպանության 100-րդ տարելիցը, Մարտիրոսյանը հույս հայտնեց, որ ԱՄՆ-ն պաշտոնապես կճանաչի Հայոց ցեղասպանությունը: Նրա գնահատմամբ, ժամանակն է, որ ԱՄՆ-ն ճանաչի նաև Լեռնային Ղարաբաղի անկախությունը: Ըստ Մարտիրոսյանի՝ փաստը, որ ԱՄՆ 5 նահանգներ արդեն ճանաչել են ԼՂ անկախությունը, ցույց տալի է նաև այդ երկրի վերաբերմունքն Արցախի նկատմամբ: «Որքան էլ ԱՄՆ-ն ազատ, անկախ և ժողովրդավարական պետություն է, և նահանգներն իրենք են որոշում կայացնում, այնուամենայնիվ, չեմ կարծում, որ 5 նահանգ, ճանաչելով ԼՂ անկախությունը, չեն ունեցել կենտրոնական իշխանությունների համաձայնությունը կամ հաստատումը»,- ասաց Մարտիրոսյանը՝ հավելելով, որ ԱՄՆ-ն պետք է գնահատի և հարգի Արցախի ժողովրդի ինքնորոշման իրավունքը:

Հայաստանում ԱՄՆ նորանշանակ դեսպան Ռիչարդ Միլս-կրտսերը երդմնակալության ժամանակ խոսել է հայ-ամերիկյան հարաբերությունների մասին և ներկայացրել դեսպանատան առաջնահերթությունները: Նա շեշտել է, որ իր և դեսպանատան օրակարգում կա երկու կարևորագույն հարց: Դրանցից առաջինը տարածաշրջանում խաղաղության հաստատումն է, երկրորդ կարևորագույն հարցը Հայոց ցեղասպանության 100-րդ տարելիցն է: