Կաթողիկոսի անվամբ հաշվեհամարի 1 միլիոն դոլար գումարն անձեռնմխելի է

Ամենայն Հայոց Գարեգին Բ կաթողիկոսի անվամբ երեք հաշվեհամար գոյություն ունի: Այս մասին «Արմենպրես»-ի սրահում կայացած մամուլի ասուլիսի ժամանակ հայտնեց Կաթողիկոսի մամուլի խոսնակ Տ. Վահրամ քահանա Մելիքյանը: Առաջին հաշվեհամարը բացվել է դեռ Վազգեն Առաջինի կաթողիկոսության շրջանում, որը նրա վախճանից հետո փոխանցվել է Գարեգին Ա կաթողիկոսին, այնուհետև' Գարեգին Բ-ին: «Վազգեն Վեհափառի շրջանում այդպիսի հաշվեհամար եղել է ու այսօր էլ կա, այն ժամանակվա բանկային օրենքներով չէր կարող եղած գումարը գրանցվել եկեղեցու անունով: Հաշվեհամարը գրանցվել է ուղղակի եկեղեցու գլխի' Ամենայն Հայոց Կաթողիկոսի անունով: Եղել է երկրորդ անձ, ով երաշխավորն է եղել այն իրականության, որ եթե Վազգեն Ա-ն վախճանվի, հնարավոր լինի փոխանցել հաջորդ կաթողիկոսին: Այդ անձը Շիրակի թեմի նախկին առաջնորդ Տ. Նարեկ եպիսկոպոս Շաքարյանն է, ով Վազգեն Առաջինի մահվանից հետո բոլոր անհրաժեշտ իրավական փաստաթղթերով իրավահաջորդ է ներկայացրել բանկին Գարեգին Ա-ին: Գարեգին Առաջինի մահվանից հետո էլ փոխանցվել է Գարեգին Երկրորդին»,- հայտնեց Վեհափառի մամուլի խոսնակը:

Այն հաշվեհամարը, որի շուրջ օրերս խոսակցություններ տարածվեցին, Տեր Վահրամի հավաստմամբ, բացվել է Գարեգին Առաջինի օրոք անհատ բարերարի կողմից, ինչը ևս փոխանցվել է ներկայիս կաթողիկոսին: «Ժամանակին հաշվեհամար բացվել է Գարեգին Առաջին Հայրապետի կաթողիկոսության շրջանում անհատ բարերարի կողմից, Վեհափառի մահվանից հետո հաշվեհամարը, ինչպես որ կարգն է, անվանափոխվել է Հայաստանի Հանրապետության տրամադրած համապատասխան փաստաթղթով իրավահաջորդ ընտրված կաթողիկոսի անունով, ով Ամենայն Հայոց Գարեգին Բ կաթողիկոսն է: 1.1 միլիոն դոլարին համարժեք գումար է, 1 միլիոնը անձեռնմխելի գումար է, մնացյալ 100 հազարը շահույթն է, որ գոյացել է այդ գումարից: Երբևէ այդ անձեռնմխելի գումարը չի կարող օգտագործվել որևէ նպատակով, այլ միայն շահույթը ինչ-որ պարբերականությամբ օգտագործվում է Մայր Աթոռ Սուրբ Էջմիածնի կողմից»,- տեղեկացրեց Վահրամ քահանա Մելիքյանը' հավելելով, որ դա անձնական հաշիվ չէ, պարզապես հաշվեհամարը տնօրինելու իրավունք ունի Հայաստանյանց Առաքելական եկեղեցու հոգևոր առաջնորդը, այդ դեպքում' Գարեգին Երկրորդը: «Հստակ տեղեկացնեմ, որ հաշվեհամարների տնօրինումը կատարվում է Կաթողիկոսի ստորագրությամբ և հաշվեհամարի վրա կարգված հոգաբարձուների գիտությամբ: Այսինքն' Մայր Աթոռը իր ֆինանսական բաժնով և նշանակված հոգաբարձուներով, ովքեր աշխարհիկներ են, տնօրինում են այդ հաշիվները»,- շեշտեց Տեր Վահրամը:

Նրա խոսքով' երրորդ հաշվեհամարն էլ բացվել է արդեն Գարեգին Բ կաթողիկոսի օրոք, երբ վերջինը նախաձեռնել է «Բարեկամներ Սուրբ Էջմիածնի» հիմնադրամը, որը ևս գործում է, տարբեր բարերարներ ու այլ անհատներ իրենց նվիրատվություններն են կատարում:

Հետաքննող լրագրողների միջազգային կոնսորցիումի օրերս հրապարակած մի փաստաթղթի համաձայն' Գարեգին Բ կաթողիկոսը HSBC բանկի փաստաթղթերում երևում է 2000 թվականից: «Ն.Ս.Օ.Տ.Տ. Գարեգին Բ Ներսես» անվամբ հաշվի վրա 1.1 մլն դոլար է եղել 2006-2007թթ.: