Արթուր Սաքունցը Կարեն Անդրեասյանի զեկույցը որակեց «երկյուղած»

Օրերս Մարդու իրավունքների պաշտպան Կարեն Անդրեասյանը ներկայացավ Պաշտպանության նախարարության աշխատանքների վեևրաբերյալ տարեկան զեկույցով, որը Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը դժվարացավ նմանեցնել ՀՀ զինված ուժերի մասին զեկույցի։

«Ընդհանրապես ասեմ, որ բոլոր հացադրումները, որոնք հասարակական կազմակերպությունների, լրագրողների, զոհված զինվորների ծնողների կողմից բարձրացվել են, ցավոք սրտի, զեկույցում համարժեք արտահայտություն չեն գտել։ Մասնավորապես՝ մահվան դեպքերի հետ կապված, կանոնադրական հարաբերությունների խախտումների հետ կապված գնահատականները  համարժեք չեն», – նշեց նա։ 

Հարցին, թե նման զեկույցը պայամանվորված է պաշտպանի՝ իրավիճակին, տեղեկություններին չտիրապետելո՞վ, Սաքունցը պատասխանեց. «Զեկույցի մեջ չի երևում, թե ՄԻՊ–ը ինչ է արել զինված ուժերում մարդու իրավունքների պաշտպանության ուղղությամբ, որովհետև մենք ակնկալում էինք, որ պետք է նկարագրվի ոչ թե իրավիճակը, այլև իր կողմից կատարված գործողությունները և գործողությունների էությունը»։ Հասարակական կազմակերպության նախագահը վկայակոչեց այն հուշագիրը, որը մարդու իրավունքների պաշտպանը կնքել էր մահացած զինծառայողների  ծնողների հետ և որի հետ կապված նույնպես ոչ մի տեղեկություն չկար, թե ինչ ընթացք է այն ստացել։

«Եթե տեղեկատվություն հավաքագրված լիներ, գործողություններ իրականացված լինեին, գոնե դրանք կներկայացվեին», – նշեց նա՝ հավելեով, որ հակված չէ մտածելու, թե ՄԻՊ–ը ինչ–որ աշխատանքներ է արել այս ոլորտում։

«Շատ, այսպես ասած, երկյուղած, մակերեսային մոտեցում է դրսևորված», – կարծիք հայտնեց Սաքունցը։

Անդրադառնալով ՄԻՊ զեկույցում՝ ՊՆ համակարգի դրական փոփոխությունների վերաբերյալ ներառված կետերին, որոնցից մեկի համաձայն՝ բանակում նախորդ տարվա համեմատ նվազել են մահացության դեպքերը, Սաքունցը նշեց, թե մահացած զինվորների թիվը նվազել է, բայց այն դեպքերի թիվը, որոնք ավարտվել են մահացությամբ, չի նվազել։

«Այսինքն՝ մեթոդոլոգիայով մենք բոլորովին այլ մոտեցում ենք ցույց տվել, որը ավելի ճիշտ է, և այդ առումով ինձ մոտ տարակուսանք է առաջացնում, որ պաշտպանը նույնիսկ դրա մեջ չի խորացել», – ասաց նա։

«ՄԻՊ ինստիտուտը ունի մանդատ՝ այցելելու զինվորական ստոաբաժանումներ, պարզապես ինքն իր մանդատը լիարժեք չի օգտագործում՝ սա մեկ։ Բայց ավելի վատը այն է, որ ավելի լավ է ոչ մի զեկույց չհրապարակել, քան թե նման զեկույց հրապարակել, որովհետև դրանով ավելի է խորացվում անվստահությունը մարդու իրավունքների պաշտպանի ինստիտուտի նկատմամբ», – կարծում է Սաքունցը։