Խախտվում է ընտրական իրավունքի հավասարության սկզբունքը. Արթուր Սաքունց

Facebook սոցիալական ցանցում իրավապաշտպան Արթուր Սաքունցն առաջարկել է պահանջել ՀՀ ոստիկանությունից՝ ընտրական ցուցակներից հանել ՀՀ այն քաղաքացիների անունները, որոնք ավելի քան 6 ամիս բացակայել են հանրապետությունից։ 

«Եթե ՀՀ քաղաքացին վեց ամսից ավել բացակայելու հիմնավորմամբ չի կարող առաջադրվել ԱԺ պատգամավորի թեկնածու, ապա նույն տրամաբանությամբ նաև քվեարկելու իրավունք պետք է չունենա, հակառակ դեպքում ընտրական իրավունքի հավասարության սկզբունքի լրջագույն խախտում է տեղի ունենում»։ 

Արթուր Սաքունցը Խաչատուր Սուքիասյանի փաստաբաններին առաջարկել է այս հարցով մտնել դատարան, ինչպես նաև վերոնշյալ նորմի սահմանադրականության հարցը բարձրացնել ՀՀ Սահմանադրական դատարանում։ 

Հիշեցնենք, որ «Ազատություն» ռադիոկայանին տված մեկնաբանությունում ոստիկանության անձնագրային և վիզաների վարչության պետ Հովհաննես Քոչարյանն ասել է, որ «եթե քաղաքացին վեց ամսից ավելի ժամկետով անընդմեջ բացակայում է Հայաստանի Հանրապետությունից, ապա նա այլեւս Հայաստանի մշտական բնակիչ չի համարվում»։

Նրա փոխանցմամբ՝ այս խնդիրը կարգավորվում է «Բնակչության պետական ռեգիստրի մասին» օրենքով և 2005 թվականին ընդունված «Բնակչության պետական ռեգիստրի համակարգ ներդնելու մասին» կառավարության որոշմամբ: Այդ որոշման համաձայն՝ ռեգիստրում անձի մշտական բնակության վայրի հասցեն փոխվում է, եթե Հայաստանի քաղաքացին Հայաստանի տարածքից դուրս է գտնվել վեց ամսից ավելի ժամկետով:

Քոչարյանի փոխանցմամբ՝ հենց այս իրավական ակտերից ելնելով է Անձնագրային և վիզային վարչությունը պնդում, որ Հայ ազգային կոնգրեսի (ՀԱԿ) ներկայացուցիչ Խաչատուր Սուքիասյանը վերջին հինգ տարիների ընթացքում Հայաստանում մշտապես չի բնակվել: Ըստ ոստիկանության, Խաչատուր Սուքիասյանը Հայաստանից անընդմեջ բացակայել է վեց ամսից ավելի՝ տաս ամիս: