Ընտրացուցակի անճշտությունների ուղղումը բնականոն գործընթաց է. Հովհաննես Քոչարյան

Այսօր մամուլում տեղեկություն էր տարածվել, ըստ որի՝ Երևանի թիվ 10 ընտրատարածքի՝ Չեխովի անվան դպրոցում տեղակայված 30-րդ տեղամասում, ըստ ընտրացուցակների, քվեարկությանը մասնակցելու է Ֆադեյ Տաճատի Սարգսյանը: Ճիշտ է, հայտնի գիտնականը, ակադեմիկոսը, ԳԱՍ նախկին նախագահը, պետական գործիչը վախճանվել է երկու տարի առաջ՝ 2010 թվականի հունվարին...

Տեղեկությունը Լուրեր.com-ը փորձեց ճշտել ՀՀ ոստիկանության անձնագրային և վիզաների վարչության պետ Հովհաննես Քոչարյանից, որը մեզ հետ զրույցում ասաց, որ ինֆորմացիան անձնագրային ծառայությունում արդեն կա:

«Մենք արդեն տեղյակ ենք, անճշտությունը կուղղենք, ընտրական ցուցակից տվյալները անպայման կհանվեն»,-ասաց Քոչարյանը:

Իսկ այն հարցին, որ շրջանառվող լուրերի համաձայն՝ սա ընտրակեղծիքի հերթական ապացույցն է, վարչության պետն ասաց. «Ի՞նչ ընտրակեղծիքի մասին կարող է խոսք գնալ, եթե բոլոր ցուցակները մենք արդեն տրամադրել ենք հրապարակային քննության: Մեր նպատակը մեկն է. եթե եղել են անճշտություններ, ստանանք արձագանք և ուղղումներ կատարենք: Օրենսգիրքը հենց այնպես չի այդ երեսուն օրը սահմանել՝ անճշտությունների ուղղման համար: Սա բնականոն ընթացք է, և կլինեն դեպքեր անձնագրային աշխատակիցների մեղքով, կլինեն դեպքեր, որ անճշտությունները կլինեն հենց քաղաքացիների մեղքով կամ ռեգիստր տրամադրող վարչական մարմինների մեղքով: Երեքն էլ հնարավոր է: Եվ որպեսզի մենք այդ ուղղումները կարգավորենք, մենք հայտարարել ենք թեժ գիծ և բազմաթիվ անգամ քաղաքացիներից խնդրել ենք արձագանքել, ինչը և արվում է»:

Կրկին անդրադառնալով ակադեմիկոս Ֆադեյ Տաճատի Սարգսյանի անունը ցուցակում հայտնվելու փաստին՝ Քոչարյանն ասաց, որ, իհարկե, տհաճ երևույթ է, բայց ամեն դեպքում ընտրական պրոցեսի իմաստով արտառոց ոչ մի բան տեղի չի ունեցել:

«Մենք անպայման այդ շտկումը կանենք: Հաշվային, թղթային հիմքերից հանված է եղել անունը, բայց ռեգիստրում տվյալը ջնջված չի եղել, արխիվացված չի եղել, արդյունքում տվյալը հայտնվել է ընտրողների ցուցակում: Արդեն հանձնարարություն կա Արաբկիր անձնագրային բաժնին, որ շտկում իրականացվի»,-ասաց վիզաների վարչության պետը:

Գայանե Համբարձումյան