Օրենքը քաղաքացուն չի արգելում իր հասցեում իքս քանակությունից ավել մարդ հաշվառել. Հովհաննես Քոչարյան

Երեկ 11/15 ընտրատեղամասի ընտրական ցուցակում հայտնաբերվել էր արտառոց երևույթ. մեկ բնակարանում գրանցված է 101 հոգի՝ Գարեգին Նժդեհ փողոցի 35-րդ շենքի 11-րդ բնակարան հասցեով: Երևույթը պարզաբանելու նպատակով Լուրեր.com-ը զրուցեց ՀՀ ոստիկանության անձնագրային և վիզաների վարչության պետ Հովհաննես Քոչարյանի հետ: Պարզվեց, որ ըստ նախնական տվյալների՝ տվյալ բնակարանի սեփականատերը գտնվում է Հանրապետության սահմաններից դուրս և օրինական հիմքերով 100-ին ել գրանցել է իր հասցեում:

«Հաշվառման փաստը մենք ստուգել ենք և որևէ խախտում չենք հայտնաբերել: Սեփականատիրոջ իրավունքն է իր հասցեում հաշվառել մարդկանց, այսինքն` նրա համաձայնությունը հաշվառելու իրավական հիմք է: Մարդկանց քանակությունը օրենսդրորեն մեզ իրավական հնարավորություն չի տալիս` մեր նախաձեռնությամբ և հայեցողությամբ նրանց հաշվառումից հանելու: Պետք է անպայման դիմի տվյալ բնակարանի սեփականտերը: Կարծում ենք, որ սեփականատերը պարզապես չարաշահել է իր իրավունքը և որոշակի շահագրգռություններով այդ մարդկանց իր բնակարանի հասեցում հաշվառել է, որպեսզի տվյալ անձինք կարողանան անձնագրավորվեն, որովհետև բոլորը եղել են ՀՀ քաղաքացիներ, ձեռք են բերել քաղաքացիություն նախագահի հրամանագրով, և որպեսզի անձնագրավորվեն` նրանց հարկավոր է եղել անպայման հաշվառվել: Կարծում եմ՝ շարժառիթը դա է եղել», - նշեց Քոչարյան:

Իսկ այն հարցին, թե օրենքը իսկապե՞ս թույլ է տալիս մի բնակարանում գրանցել 100 և ավելի անձանց, Հովհաննես Քոչարյանը պատասխանեց. «Քաղաքացին կարող է անել, այն ինչը իրենց չի արգելվում օրենքով: Օրենքը քաղաքացուն չի արգելում իր հասցեում իքս քանակությունից ավել մարդ հաշվառել: Այդ իրավունքը, սակայն, նա չարաշահել է, այդ պատճառով էլ այդպիսի աննորմալ փաստ է արձանագրվել: Նման դեպքեր կրկին կարող են լինել, բայց այս պահի դրությամբ մենք գտել են տվյալ բնակարանի տիրոջ հարազատին, խնդրել ենք տրամադրել նրա հեռախոսահամարը, կապվել ենք հետը, պահանջել ենք պարզաբանում, և նա խոստացել է, որ անպայման լիազորագիր կուղարկի սահմանված կարգով և այդ անձանց իր հասցեի հաշվառումից կհանի: Եթե նա այստեղ լիներ, դա ավելի արագ կլիներ, իսկ նա, ինչպես հասկացանք, Ֆրանսիայում է»- նշեց Հովհաննես Քոչարյանը:

Ազատուհի Արասխանյան