Փոխոստիկանապետ Գևորգ Մհերյանի սպանության պատճառը Վրաստանի քաղաքացիներին հայկական անձնագրի տրամադրումն է. Գուրգեն Եղիազարյան

Թերթերից մեկի հետ զրույցում ՍԴՀԿ անդամ, ՀԱԿ ներկայացուցիչ Գուրգեն Եզիազարյանը հայտարարել է, որ իր համար արդեն հասկանալի է, թե նախկին փոխոստիկանապետ Գևորգ Մհերյանին ինչու սպանեցին:

«Չար լեզուները պատմում են, որ երբ սպանեցին Մհերյանին, նա տեղյակ էր մեր ջավախահայության ցուցակներից և այն բանից, թե քանի միլիոն են աշխատել այդ մարդկանց անձնագիր տալու համար: Հենց այս ամենի համար զոհվեց Մհերյանը»,- նշել է Եղիազարյանը:

«Ես գիտեմ, որ դեռ այն ժամանակ  լուրեր էին շրջանառվում, որ ջավախահայությունից հազարավոր մարդիկ գրանցվել են և փաստաթղթեր են ստացել Հայաստանի Հանրապետությունից՝ լինելով այլ երկրի քաղաքացի, ինչը համարում եմ շատ նորմալ», – Լուրեր.com–ի հետ զրույցում թեման շարունակեց Եղազարյանը։ Ըստ նրա՝ ջավախահայերի մասսայական գրանցումները սկսվեցին հարավօսական պատերազմի ժամանակ, երբ Ռուսաստանը փակել էր Վրաստանի հետ սահմանը, իսկ մեր հայրենակիցնրը պետք է աշխատելու նպատակով մեկնեին Ռուսաստան։

«Լուրեր էին շրջանառվում, որ այդ մարդկանց թվում մի շարք վրացի հանցագործներ նույնպես անձնագրեր են ստացել անձնագրային բյուրոյից։ Խոսքը գնում է ավելի քան երեսուն մարդու մասին», – նշեց նա։

Եղազարյանի խոսքերով՝ գրանցված ջավախահայերի ցուցակները օգտագործում էին ընտրությունների ժամանակ՝ ընտրակեղծիքներ կատարելու համար։ 

«Այդ գրանցումները, անձնագրերով գումարներ աշխատելը և Վրաստանի քաղաքացիներին մեզ մոտ գրանցելը նաև երկրորդ նպատակն էր հետապնդում. չէ՞ որ այդ քաղաքացիները՝ Վրաստանի գրանցված քաղաքացիները, որոնք գրանցում էին ստանում նաև Հայաստանում, դառնում էին ընտրազանգված», – բացատրեց Եղազարյանը՝ հավելելով, որ այդ մեխանիզմը մեծ քանակով ձայներ էր ապահովում, ինչով էլ, ըստ նրա, իշխանությունը վերարտադրվում է։ 

«Այդ առումով նրանք նույնիսկ նպատակ չունեին այդ հարցին մոտիկ գալու։ Ինչի՞ մասին է խոսքը, իրենք հո չէի՞ն կտրելու այն ճյուղը, որի վրա նստած են», – ասաց նա։

Անդրադառնալով Գևորգ Մհերյանի սպանության պատճառներին՝ Եղազարյանը նշեց, որ փոխոստիկանապետը, տեղեկանալով այդ ցուցակների կազմման մասին, փորձել է բարձրացնել այս հարցը։

«Նոր մարդ է եղել, ամենայն հավանականությամբ, այդ նոր մարդը անմիջապես զեկուցել է, որ գիտեք՝ այսպիսի բան կա, այսքան գումարներ են շրջանառության մեջ մտնում, գալիս են մարդիկ հանցավոր անցյալով, ստանում են ՀՀ անձնագիր և մաքրվում են, գնում են դրանով Եվրոպա», – նշեց Եղազարյանը։

Ինչ վերաբերում է փոխոստիկանապետի սպանության պատվիրատուներին, ՍԴՀԿ անդամը հիշեցրեց, որ Մհերյանի ղեկավարը՝ Ալիկ Սարգսյանը, նրա սպանությունից հետո հայտարարել էր, թե իր համար պատվի հարց է այդ սպանության բացահայտումը. «Հիմա դրան հարց տվեք՝ ի՞նչ եղավ էդ պատիվը»։

Ինքը՝ Եղիազարյանը կարծում է, որ Մհերյանին սպանել են այն տարրերը, որոնց համար շատ կարևոր էր, որ ջավախահայությանը տված անձնագրերի ցուցակը մինչև վերջ չբացահայտվի։ Հարցին, թե արդյո՞ք այդ տարրերի տակ պետք է հասկանալ ներկայիս իշխանություններին՝ վերջինս ենթադրությունները անելը թողեց մեզ՝ նշելով. «Ես մեխանիզմներ չունեմ ապացուցելու։ Եթե չունեմ մեխանիզմը ապացուցելու, ապա ինչպե՞ս կարող եմ ասել»։