Պատմաբանը Հայոց ցեղասպանության միջազգային ճանաչման գործընթացում առաջընթաց է նկատում

ԵՊՀ հայոց պատմության ամբիոնի պրոֆեսոր, պատմական գիտությունների դոկտոր Աշոտ Հայրունին Հայոց ցեղասպանության ճանաչման գործընթացում զարգացում և առաջընթաց է նկատում:

Ապրիլի 15-ին լրագրողների հետ հանդիպմանը Հայրունին ընդգծեց, որ Հայոց ցեղասպանության 100-րդ տարելիցը պետք է որևէ մեկի մոտ հուսախաբություն չառաջացնի: «Ինձ համար 100-րդ տարելիցը Ցեղասպանության ճանաչման համատեքստում նույնն է, ինչ 99-րդ տարելիցը կամ 101-րդը: Կարևորն այն է, որ Ցեղասպանության ճանաչման գործընթացը զարգացում է ապրում, որ Ցեղասպանության ճանաչումը վաղեմության ժամկետ չունի, ինչն ամրագրված է 1968թ. նոյեմբերին ընդունված միջազգային կոնվենցիայում»,- «Արմենպրես»-ի հաղորդմամբ՝ ընդգծեց Հայրունին:

Նա նկատեց, որ ներկայումս առկա են բազմաթիվ սկզբնաղբյուրներ, որոնք այլևս հստակ փաստում են Թուրքիայի ցեղասպան քաղաքականության և դրա հետևանքների մասին: «Ես կարծում եմ, որ շուտով կգա այն ժամանակը, երբ որևէ պետություն Ցեղասպանության ճանաչումը կախման մեջ չի դնի իր տնտեսական և քաղաքական շահերից, ինչպես հիմա որոշ պետություններ շարունակում են անել».- ընդգծեց Հայրունին:

Պատմաբանը Հայոց ցեղասպանության միջազգային ճանաչման գործընթացում կարևորում է տարբեր երկրներում հասարակական կարծիքի ձևավորումը: «Գիտեք, միայն վերջին շաբաթների ընթացքում Եվրոպայում և ամբողջ աշխարհում Հայոց ցեղասպանության մասին այնպիսի իրազեկում եղավ, ինչպես չէր եղել վերջին տասնամյակների ընթացքում: Եվ սա շատ ողջունելի և ուրախալի է, քանի որ հասարակական կարծիքը շատ կարևոր հանգամանք է, որպեսզի պետական քաղաքականությունն ուղղորդվի: Կարծում եմ, որ դա շատ կարևոր նշանակություն կունենա Ցեղասպանության ճանաչման գործընթացը այս և հաջորդ փուլերում արագացնելու համար»,- ընդգծեց Հայրունին:

Նրա գնահատմամբ՝ Թուրքիայի կառավարությանը, որը շարունակում է իր ժխտողական քաղաքականությունը, այս ամենը խիստ մտահոգում է: Ուրախալի է, որ նաև Թուրքիայի հասարակությունն է իրազեկվում Հայոց ցեղասպանության մասին: «Կարծում եմ, որ կգա ժամանակը, երբ Թուրքիայում հասարակական ճնշման ներքո այդ երկրի կառավարությունը ստիպված կլինի ճանաչել Հայոց ցեղասպանությունը: Ուրախալի է, որ Թուրքիայի հասարակությունն արդեն բավականաչափ իրազեկված է Հայոց ցեղասպանության մասին, և թուրքերի կողմից ի հայտ են գալիս նախաձեռնություններ, որոնք ուղղված են Հայոց ցեղասպանության միջազգային ճանաչմանը»,- ասաց պատմաբանը: