Ինձ համար մեծ պատիվ է, որ ինձ բաժին հասավ հենց Մինաս Ավետիսյանի շարքը. Արամ Դանիելյան

Ապրիլի 7-ին «Մերիդիան էքսպո» կենտրոնում տեղի է ունեցել Լիլիթ Մարգարյանի նորաձևության տան «Gallery 100» նոր հավաքածուի ցուցադրությունը, որը նվիրված էր Հայոց ցեղասպանության 100-րդ տարելիցին: Միջոցառմանը ներկա են եղել քաղաքական գործիչներ, շոու-բիզնեսի ներկայացուցիչներ:

Ներկայացված հավաքածուն ներառում է շուրջ 100 զգեստ, որոնք ստեղծելիս թիմը ոգեշնչվել է 20-րդ դարի հայ նկարիչների ստեղծագործություններից: Հիմքում Սարյանի, Սուրենյանցի, Հակոբյանի, Մինասի, Կալենցի, Գառզուի և հայտնի այլ նկարիչների ստեղծագործություններն են:

Զգեստների միջոցով ներկայացվել է մի ամբողջ դարաշրջան՝ երկրաչափական ձևվածքներով ու մինիմալիստական լուծումներով: Այս հետաքրքիր միջոցառմանը մասնակցել է նաև գեղանկարիչ Արամ Դանիելյանը, ով Լիլիթ Մարգարյանից ստացել էր առաջարկ' իր ներդրումն ունենալ Մինաս Ավետիսյանին նվիրված պատկերների ստեղծմանը:

-Մենք գիտենք, որ հավաքածուի հիմքում հայ կնոջ կերպարն է ու նրա ոճի զարգացումը, ով կարողացել է պահպանել բարոյական բարձր արժեքները' անկախ պատմության դաժան էջերից: Այս հավաքածուի հագուստների վրա ներկայացված Ձեր աշխատանքներն արվել են հայ գեղանկարչության մեծահռչակ դեմքերից մեկի՝ Մինաս Ավետիսյանի նկարների հիման վրա. ընտրությունը պատահակա՞ն էր, թե՞ ինքներդ եք ընտրել հենց Մինասին:

-Հավաքածուն ստեղծել է դիզայներ Լիլիթ Մարգարյանը, որում ընդգրկվել է նաև Մինաս Ավետիսյանին նվիրված և նրա աշխատանքների մոտիվներով ստեղծված հավաքածուն: Ես Լիլիթ Մարգարյանից ստացա առաջարկ' ունենալ մասնակցություն Մինաս Ավետիսյանին նվիրված պատկերների ստեղծման գործում: Խնդիրը շատ բարդ էր: Ուսումնասիրվեց Մինասի ստեղծագործական տեխնիկան: Պետք է նշեմ' ինձ համար մեծ պատիվ է, որ ինձ բաժին հասավ հենց Մինաս Ավետիսյանի շարքը: Չեմ կարող չնշել նաև, որ շատ կարևոր հանգամանք էր այս միջոցառմանը դիզայներ Նուռի մասնակցությունը: Նրա կողմից ստեղծված զարդերը համահունչ էին հավաքածուին և տալիս էին զգեստներին, այսպես ասած, հետաքրքիր ներդաշնակություն: Իսկ ինչ վերաբերում է ցուցադրությանը, այն իր ձևի մեջ համարում եմ ստացված և բացառիկ:

-Խոսեցինք հայ կնոջ կերպարի մասին, Ձեր գործերում ի՞նչ դերակատարություն ունի հայ կինն ու ընդհանրապես կինը:

-Եթե ուշադրություն դարձնեք իմ աշխատանքներին, ապա կնկատեք, որ հիմնական կերպարները կանայք են: Հենց նրանց միջոցով եմ արտահայտվում և ոգեշնչվում: Նրանք ամեն աշխատանքի մեջ պատկերված են յուրովի' ներկայացնելով հոգեկանի և մարմնականի յուրօրինակ և գեղեցիկ տրամադրություններ:

-Այս նախագիծը հետաքրքիր էր հնի և նորի յուրօրինակ համադրությամբ, ի՞նչ նոր բան տվեց նախագիծը ձեզ, կամ ի՞նչ տվեցիք Դուք արվեստասեր հասարակությանը:

-Արվեստը սիրում է ուշադրություն. այն, այսպես ասած, փոխադարձ վերաբերմունքների կրող է, եթե դու սիրում ու պաշտում ես նրան, ապա նա քեզ կարող է շռայլորեն վարձատրել. այս պարագայում մեր փոխադարձ սերը արվեստասեր հասարակությանը նվիրեց նոր, միևնույն ժամանակ' հարազատ շնչով ու սիրով ոգեշնչված աշխատանքներ:

-Ի՞նչ սպասենք գեղանկարիչ Արամ Դանիելյանից, կխոսեք նոր ծրագրերի և անելիքների մասին:

-Ծրագրեր շատ կան: Ամռանը Ռուսաստանում կունենամ ցուցադրություն, բայց ամենակարևոր իրադարձությունը կլինի իմ անհատական ցուցահանդեսը, որը ծրագրում եմ անցկացնել Երևանում աշնանը: Հանդիսատեսի ուշադրությանը կհանձնեմ իմ վերջին տարիների աշխատանքները: Այս գործընթացին պատրաստվում եմ մեծ եռանդով և ոգևորությամբ: Ցուցադրության մասին արվեստասեր հանրությունը նախապես կտեղեկանա: