«Հրապարակ». ԵՏՄ անդամ երկրները կգան, բայց ոչ նախագահների մակարդակով

Թեև մի քանի օր է լրատվամիջոցները գրում են, որ հաստատապես ՌԴ նախագահ Վլադիմիր Պուտինը Հայաստան կժամանի ապրիլի 24-ին, սակայն պետական այրերը համառորեն նշում են, որ դեռ հստակ պարզ չէ: ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը երեկ մեզ հետ զրույցում ընդամենը կարծիք հայտնեց, որ Պուտինը կժամանի Հայաստան. «Ես կարծում եմ, որ Ռուսաստանի նախագահին մենք կհյուրընկալենք Հայաստանում ապրիլի 24-ի միջոցառումներին»: Իսկ գալու վերաբերյալ պաշտոնական պատասխան իրենց կողմից չկա՞: «Պաշտոնական պատասխանի համար դեռ ժամանակ կա, նախապատրաստական աշխատանքները, որքանով ես տեղյակ եմ, իրականացվում են»,-ասաց նա: Իսկ ո՞ր պետությունների ղեկավարներն են, առհասարակ, ժամանելու Հայաստան այդ օրերին: Զաքարյանն ասաց. «Ֆրանսիայի և Կիպրոսի նախագահները կլինեն, Ֆրանսիայի նախագահի պաշտոնական հայտարարությունն արդեն կա, մենք ակնկալում ենք Կիպրոսի նախագահի մասնակցությունը, նաև մոտ 50 երկրներից լինելու են տարբեր մակարդակի պատվիրակություններ՝ խորհրդարանների նախագահների, արտգործնախարարների, փոխվարչապետերի գլխավորությամբ»: Նա նաև նշեց, որ հրավերներն ուղարկվում են բոլոր ուղղություններով, և պետություններն իրենք են որոշում, թե ինչ մակարդակով մասնակցեն: Զաքարյանը հավելեց, որ կան պետություններ, որոնք տարբեր պաշտոնյաների մակարդակով այդ օրը մասնակցելու են ե՛ւ Հայաստանում Ցեղասպանության 100-ամյա տարելիցին նվիրված միջոցառումներին, ե՛ւ Թուրքիայում Գալիպոլիի ճակատամարտի կապակցությամբ հայտարարված միջոցառմանը: Այս թեմայի շրջանակներում մի քանի հարց «Հրապարակ»-ն ուղղել է Ա. Զաքարյանին:

- Նախագահների մակարդակով մասնակցությունը կարծես թե շատ քիչ է՝ ընդամենը 2-3 հոգի, սա բացասական երանգ չի՞ հաղորդի միջոցառմանը:

– Բացասական երանգ մի՛ փնտրեք այնտեղ, որտեղ չկա, խնդիրը բարոյական հարթության մեջ է, պետություններն իրենք են որոշում՝ ինչ մակարդակով գալ, մասնակցել: Չկա մի պետություն, որը հայտարարեր, որ Հայոց ցեղասպանություն չի եղել, դա կեղծ ակցիա է, և մենք չենք գալիս մասնակցելու: Ովքեր որ չեն գալիս ամենաբարձր մակարդակով մասնակցելու, բնականաբար, խնդիրը դիտարկում են Թուրքիայի հետ ունեցած շահերի տեսանկյունից: Կան պետություններ, որոնք դրա մասին նույնիսկ բարձրաձայն են հայտարարում, և շատ քիչ պետություններ կան, որոնք, անտեսելով քաղաքական շահերը, վեր են կանգնում դրանցից և խնդիրը դիտարկում են արժեքային համակարգում:

Շարունակությունը` թերթի այսօրվա համարում: