Հայոց ցեղասպանության հարցում Թուրքիան վերանայելու է իր դիրքորոշումը. Ալեքսանդր Արզումանյան

Եվրախորհրդարանի բանաձևի կարևորությունը կայանում է նրանում, որ առաջին անգամ այս գործընթացում Հայաստանի Հանրապետությունը հանդես եկավ որպես սուբյեկտ: ՀՀ ԱԺ պատգամավոր Ալեքսանդր Արզումանյանը հիշում է, որ 1987 թվականին Եվրախորհրդարանի ընդունած բանաձևն առավելապես նպատակ ուներ Թուրքիային ետ պահել Եվրոմիությունից, մինչդեռ այս բանաձևում դրույթներն ավելի համապարփակ են ներկայացված:

«Բանաձևում կան լավ շեշտադրումներ, և այս կետի վրա պետք չէ կանգնել, պետք է շարունակել, քանի որ սա մեզ համար պատեհ առիթ է' հնարավորինս լավ ներկայացնելու 100-րդ տարելիցը»,- «Արմենպրես»-ի փոխանցմամբ, ասաց Արզումանյանը' հավելելով, որ բանաձևը նաև Հայաստանի դիվանագիտական խողովակների ակտիվ աշխատանքի և լոբբիստական կազմակերպությունների հորդորների արդյունքն է:

Թե՛ բանաձևի, թե՛ Հռոմի Ֆրանցիսկոս պապի ելույթի առնչությամբ Թուրքիայի արձագանքն Արզումանյանն անվանում է ոչ ադեկվատ: Էրդողանի հայտարարություններն ու մեղադրանքները պատգամավորին ոչ միայն զարմացրել են, այլև ստիպել մտածելու, թե ինչ շրջապատում է մեծացել Թուրքիայի նախագահն ու ինչ կրթություն է ստացել:

«Թուրքիան ոչ թե ագրեսիվ, այլ ոչ ադեկվատ, անհասկանալի դիրքորոշում է բռնել, և սա ձանձրացնում է միջազգային հանրությանը: Թուրքիան չի համակերպվում մտքի հետ, որ այլևս տարածաշրջանում առաջատարը չէ: Հռոմի պապին մեղադրել կեղծարարության, ստի մեջ և սպառնալ՝ դրանք անհեթեթության հերթական դրսևորումներ են»,- ասաց Արզումանյանը' չբացառելով, որ անհեթեթ դրսևորումները կշարունակվեն, ինչը կհանգեցնի համապատասխան արձագանքի միջազգային հանրության կողմից:

Արզումանյանի գնահատմամբ՝ ապրիլի 24-ով Ցեղասպանության միջազգային ճանաչման պայքարը չի վերջանալու, և գալու է այն պահը, երբ Թուրքիան առերեսվելու է սեփական պատմության հետ:

«Կասկած չունեմ, որ Թուրքիան վերանայելու է իր դիրքորոշումները: Աշխարհն է փոխվում, մտածելակերպն է փոխվում, և գալու է այն պահը, երբ Թուրքիան առերեսվելու է սեփական պատմության հետ և նստելու բանակցությունների սեղանի շուրջ»,- եզրափակեց Արզումանյանը: