System of a Down-ի երևանյան մենահամերգին կկարողանա մասնակցել մոտ 50 հազար մարդ

Գիտություն և Մշակույթ 18 Ապրիլ, 2015 1:14

ՀՀ ոստիկանությունը նախապատրաստվում է Հայոց ցեղասպանության տարելիցին նվիրված միջոցառումներին: ՀՀ ոստիկանության պետի տեղակալ, ոստիկանության գնդապետ Սամվել Հովհաննիսյանն ապրիլի 17-ին լրագրողների հետ զրույցում անդրադարձավ այդ աշխատանքների ընթացքին:

«Ցեղասպանության տարելիցին նվիրված միջոցառումներին ընդառաջ ոստիկանությունը ստեղծել է աշխատանքային խումբ, որը ստորաբաժանումներին հանձնարարական է տվել միջոցառումների անցկացման ընթացքում իրականացնել հասարական կարգի պահպանում, ապահովել մարդկանց անվտանգությունը: Ապրիլի 1-ից անցել ենք ուժեղացված ծառայության, օրինակ երեք՝ Հաղթանակի զբոսայգու, Կիևյան փողոցի և Դավիթաշենի տարածքում գտնվող կամուրջների տարածքում, անվտանգության նկատառումներից ելնելով, ուժեղ ծառայություն է իրականացվում»,- «Արմենպր ես»-ի փոխանցմամբ՝ նշեց Սամվել Հովհաննիսյանը:

Ոստիկանության գնդապետի խոսքով՝ ապրիլի 5-ից ծառայողական շներով ծառայություն է իրականացնում: «Ինչքան մոտենանք միջոցառումների բուն անցկացման ժամանակին, կխստանա վերաբերմունքը: Տարելիցին նվիրված հիմնական միջոցառումները սկսվում են ապրիլի 22-ին՝ Մարզահամերգային համալիրում անցկացվելու է «Ընդդեմ ցեղասպանության» խորագրով ֆորումը, որին մասնակցելու են բարձրաստիճան պաշտոնյաներ: Նույն օրը երեկոյան Մայր Աթոռ Սուրբ Էջմիածնում կլինի հսկման կարգ, որը նախորդում է սրբադասման արարողությանը»,- տեղեկացրեց Սամվել Հովհաննիսյանը: Նրա խոսքով՝ հաջորդ օրը՝ ապրիլի 23-ին կավարտվի ֆորումը, և Էջմիածնում կսկսվի Հայոց ցեղապանության նահատակների սրբադասման արարողությունը, որը կարող են դիտել նաև Հանրապետության հրապարակում տեղադրված էկրաններից:

«Արարողության ավարտից հետո տեղի կունենա System of a Down ռոք-խմբի համերգը: Փակ կլինեն Հանրապետության հրապարակին հարող փողոցները, համերգին մասնակցել ցանկացողները միայն Շահումյան հրապարակի կողմից կկարողանան մտնել հրապարակ: Մասնակիցների թիվը սահմանափակ է լինելու, հատուկ սարքեր են տեղադրվելու, որոնց միջոցով կիմանանք մասնակիցների քանակը: Սահմանաչափը կլինի 50 հազար մարդ»,- հավելեց նա:

Ոստիկանության գնդապետի խոսքով՝ ապրիլի 24-ին Ծիծեռնակաբերդի հուշահամալիր այցելող քաղաքացիները կկարողանան հարգանքի տուրք մատուցել ժամը 13:00-ից հետո, քանի որ մինչ այդ արարողակարգային միջոցառումներ են լինելու, և այդ հատվածը փակ է լինելու:

«Փակ կլինի Բաղրամյան պողոտան, Հանրապետության հրապարակը՝ կիսով չափ, Կիևյան փողոցը: 20:15-ին տեղի կունենա «Վերածնունդ» համերգ-ակցիան, որի ավարտին նախատեսվում է ջահերով երթ դեպի Ծիծեռնակաբերդի հուշահամալիր: Համերգից հետո փողոցները փակ չեն լինի: Մենք ունենք պաշտոնական պատվիրակություններ նախագահների մակարդակով, հայցում ենք քաղաքացիների ներողամտությունը, և խնդրում, որ երթևեկությունը կազմակերպեն սահմանափակ ձևով: Հորդորում ենք անհարկի երթևեկությունից ձեռնպահ մնալ»,- նշեց նա:

Ըստ Հովհաննիսյանի՝ ոստիկանությունը կոչ է անում, որ քաղաքացիներն օգնեն իրենց՝ աշխատանքներն արդյունավետ իրականացնելու նպատակով, քանի որ այդ օրերին Հայաստանն ամբողջ աշխարհի կենտրոնում է լինելու: Այդ օրերին ոստիկաններ կլինեն ամենուր, և նրանք ամեն ինչ կանեն անվտանգություն ապահովելու համար: