Կործանվող պետության ցուցանիշներով վարչապետը

Օրեր առաջ լրացավ վարչապետ Հովիկ Աբրահամյանի պաշտոնավարության մեկ տարին: Մեկ տարին լիովին բավարար է՝ պատկերացում կազմելու սույն պաշտոնյայի աշխատանքի արդյունավետության մասին:

Հարկ է ընդգծել, որ այն սոցիալական, տնտեսական խնդիրները, որ կային, դրանք չեն լուծվել՝ աղքատություն, գործազրկություն, ներդրումների ծավալ և այլն: Ավելին, Հովիկ Աբրահամյանի վարչապետության օրոք իրավիճակն այնքան է վատացել, որ նախատեսված 4 տոկոս տնտեսական աճի փոխարեն կանխատեսվում է 1 տոկոս տնտեսական անկում: Սա ուղղակի ամենախայտառակ ցուցանիշն է՝ մեր բոլոր վարչապետների համեմատությամբ:

Այդպես էլ չկարգավորվեցին կենսաթոշակային համակարգը, «Նաիրիտ»-ի աշխատավարձերի խնդիրը: Պաշտոնական տվյալներով, մեկ տարվա ընթացքում արտահանման ծավալները նվազել են, ներդրումների ծավալը կրճատվել է, գնաճը հասել է 5 տոկոսի, դրամն արժեզրկվել է 20 տոկոսով, արտաքին պարտքն ավելացել է 700 մլն դոլարով, երկրի արտաքին պահուստները կրճատվել են 400 մլն դոլարով:

Սա արդեն կործանվող պետության ցուցանիշ է: Ու այս խայտառակ թվերի հեղինակը շարունակում է պաշտոնավարել:

Վերջում ուզում եմ շեշտել, որ Հովիկ Աբրահամյանի շռայլ ծախսերը ամենևին աղքատ երկրի վարչապետի ծախսեր չեն: Վառ օրինակ. այս տարվա արտերկրյան 2 գործուղղումների համար միայն չարտերային չվերթների վրա Հովիկ Աբրահամյանը բյուջեից ծախսել է 49 մլն դրամ:

Ինչպես ասում են՝ երբ թվերը խոսում են, բառերն ավելորդ են:

Արամ Հակոբյան