Վահե Էնֆիաջյանը կարևորում է ՀՀ ԱԺ-ի կողմից Ցեղասպանությունը դատապարտող հայտարարության ընդունումը

Ազգային ժողովի ԲՀԿ խմբակցության քարտուղար Վահե Էնֆիաջյանը համոզված է, որ Ազգային ժողովը ապրիլի 21-ի արտահերթ նիստում միաձայն կընդունի Հայոց ցեղասպանության 100-րդ տարելիցի կապակցությամբ հայտարարությունը: Ապրիլի 20-ին լրագրողների հետ հանդիպմանը Էնֆիաջյանն ընդգծեց, որ այդ հայտարարության ընդունումը շատ կարևոր նշանակություն ունի, քանի որ դրանով բոլոր երկրների խորհրդարաններին և միջազգային այլ կառույցների կոչ է արվում ճանաչել և դատապարտել Հայոց ցեղասպանությունը: «Մենք շատ ենք կարևորում այս հայտարարությունը, և կարծում եմ, որ Ազգային ժողովի կողմից սխալ կլիներ նման նախաձեռնությամբ հանդես չգալը: Ես համոզված եմ, որ մենք միաձայն ընդունելու ենք այս հայտարարությունը՝ հերթական անգամ ցույց տալով մեր միասնականությունն այս հարցում»,- «Արմենպրես»-ի հաղորդմամբ՝ ընդգծեց Էնֆիաջյանը:

Էնֆիաջյանը նշեց, որ այս օրերին հայ ժողովուրդը պետք է միասնական լինի և աշխարհի համար ներկայանալի դարձնի իր պահանջատիրությունը: Պատգամավորն ուշադրություն հրավիրեց այն հանգամանքի վրա, որ Հայոց ցեղասպանության 100-րդ տարելիցի կապակցությամբ հայտարարության նախագծի հեղինակը ընդդիմադիր խմբակցության՝ «Ժառանգության» պատգամավոր Զարուհի Փոստանջյանն է, իսկ հայտարարությանը միացել են բոլոր խմբակցությունները: Նրա խոսքով՝ սա էլ խոսում է այն մասին, որ Հայաստանում բոլոր քաղաքական ուժերը միասնական են այս հարցում՝ անկախ իրենց քաղաքական հայացքներից: