Հանրապետության լեռնային շրջաններում սպասվում են ձյան տեսքով տեղումներ

Հանրապետության տարածքում ապրիլի 21-24-ին, 25-ի գիշերը ժամանակ առ ժամանակ շրջանների զգալի մասում, 25-ի ցերեկը արևելյան շրջաններում սպասվում է անձրև և ամպրոպ, հնարավոր է կարկուտ: Ապրիլի 21-ի գիշերը հյուսիսային շրջաններում սպասվում է ինտենսիվ անձրև, 23-ին և 24-ին լեռնային շրջաններում տեղումները սպասվում են թաց ձյան տեսքով: Ինչպես «Արմենպրես»-ին տեղեկացրին ՀՀ ՏԿԱԻՆ հիդրոօդերևութաբանության և մոնիտորինգի պետական ծառայությունից, օդի ջերմաստիճան ապրիլի 21-24-ին աստիճանաբար կնվազի 5-7, 25-ի ցերեկը կբարձրանա 2-3 աստիճանով: Քամին հարավարևմտյան՝ 5-10 մ/վրկ արագությամբ, ապրիլի 21-22-ին առանձին շրջաններում սպասվում է քամու ուժգնացում՝ 20-25 մ/վրկ արագությամբ:

Գետերում սպասվում է ջրի ելքերի մեծացում, Դեբեդ գետի ավազանում հնարավոր են ջրի անբարենպաստ ելքեր:

Երևանում ապրիլի 21-24-ին, 25-ի գիշերը ժամանակ առ ժամանակ սպասվում է անձրև և ամպրոպ, ամպրոպների ժամանակ քամու ուժգնացում' 15-20 մ/վրկ արագությամբ: Ապրիլի 25-ի ցերեկը սպասվում է տեղումների դադար: Ապրիլի 21-ի ցերեկային ժամերին մայրաքաղաքում կգրանցվի +20 աստիճան, ապրիլի 22-ին՝ +18, ապրիլի 23-24-ին՝ +15, ապրիլի 25-ին՝ +18 աստիճան: