Կնոջ անվան տակ ծանոթությունների կայքի միջոցով խաբել է բրիտանացուն և գումար կորզել

ՀՀ գլխավոր դատախազության ՀՀ ազգային անվտանգության մարմիններում քննվող գործերով վարչությունում Մեծ Բրիտանիայի քաղաքացու դիմումի հիման վրա ՀՀ ոստիկանությունում նախապատրաստված նյութերով հարուցվել է քրեական գործ՝ հանցավոր ճանապարհով ստացված եկամուտներն օրինականացնելու համար:

Մեծ Բրիտանիայի քաղաքացի Մ. Վ. Լիունը, դիմելով ՀՀ ոստիկանությանը, հայտնել է, որ 2011թ. սկզբին «Match.com» ծանոթությունների կայքի միջոցով ծանոթացել է ոմն Նաիրա Գյուրջինյանի հետ: Վերջինս, չարաշահելով Մ. Վ. Լիունի վստահությունը «Moneygram» դրամական համակարգի միջոցով հափշտակել է 1760 եվրո գումար:

ՀՀ ոստիկանության կազմակերպված հանցավորության դեմ պայքարի գլխավոր վարչությունում նախապատրաստված նյութերով պարզվել է ոչ միայն տվյալ հափշակության մեխանիզմը, այլ նաեւ այն, որ այն իրականացրել է հանցավոր խումբ եւ որ Մեծ Բրիտանիայի քաղաքացի Մ. Վ. Լիունը նրանց միակ «զոհը» չէ:

Մասնավորապես՝ ըստ նախապատրաստված նյութերի՝ Շիրակի մարզի Ղարիբջանյան գյուղի բնակիչ Գ. Ավետիսյանը 2009թ. ամռանը նախնական համաձայնության է եկել ՌԴ Յոշկար Օլա քաղաքում բնակվող իր ազգականներ, ՌԴ քաղաքացիներ, եղբայրներ Վարդան եւ Վահրամն Պողոսյանների հետ՝ արտասահմանում բնակվող անծանոթ անձանց պարբերաբար փոխանցումներով կասկածելի ծագման գումարների ստացման, հանցավոր ճանապարհով ստացված միջոցների իրական բնույթն ու ծագման աղբյուրը թաքցնելու եւ խեղաթյուրելու, մասնավորապես՝ դրանք մասամբ կոնվերտացնելու, ապա գումարի որոշակի մասը կնոջ եւ այլ անձանց անվամբ հանցակիցներին փոխանցելու, այսինքն՝ հանցավոր ճանապարհով ստացված եկամուտներն օրինականացնելու վերաբերյալ:

Գ. Ավետիսյանը կնոջ՝ Ն. Գյուրջինյանի անվամբ վերոհիշյալ դրամական միջոցներն ստանալու համար Վարդան Պողոսյանին է տվել նրա կենսորոշիչ տվյալները՝ կանխիկացված գումարի 10%-ը որպես մասնաբաժին ստանալու պայմանով:

Պողոսյան եղբայրների հանցակիցները Ն. Գյուրջինյանի անվան տակ «Match.com» ծանոթությունների կայքի միջոցով ծանոթացել են Մեծ Բրիտանիայի քաղաքացի Մ. Վ. Լիունի հետ եւ սիրային նամակագրական կապ հաստատել վերջինիս հետ: Արդյունքում՝ Մ. Վ. Լիունը ամուսնանալու նպատակով Մեծ Բրիտանիա այցելելու պատրվակով «Moneygram» դրամական համակարգի միջոցով Ն. Գյուլիջանյանին է փոխանցել 1760 եվրո գումար, որը հափշտակվել եւ վերը նկարագրված եղանակով օրինականացվել է:

Բացի այդ, պարզվել է նաեւ, որ Պողոսյան եղբայրների եւ նրանց հանցակիցների կատարած գործողությունների հետեւանքով տուժել են եւս 11 անձինք՝ եվրոպական 3 երկրներից:

Ըստ նախաքննությամբ ձեռք բերված տվյալների 2010թ. մայիսի 5-ից մինչեւ 2011թ. օգոստոսի 29-ն ընկած ժամանակահատվածում Ն. Գյուլիջանյանի անվամբ «Moneygram» դրամական համակարգի միջոցով 37 դեպքով Հայաստանի մի շարք բանկեր են փոխանցվել ընդհանուր առմամբ 9 657 եվրո եւ 14 490 ԱՄՆ դոլար գումար:

Հիշյալ նախնական համաձայնության շրջանակներում ստացված գումարը կանխիկացնելուց հետո 10%-ը տնօրինվել է Գ. Ավետիսյանի կողմից, 7 212 ԱՄՆ դոլարը 14.05.2010թ. մինչեւ 2010թ. դեկտեմբերն ընկած ժամանակահատվածում՝ 8 դեպքով: «Զոլոտայա կորոնա» եւ «Կոնտակտ» արագ դրամական փոխանցման համակարգերի միջոցով Ն. Գյուլիջանյանի անունից փոխանցվել է Վահրամ Պողոսյանին, իսկ տարբերություն կազմող մյուս գումարը՝ մինչեւ 2011թ. աշունն ընկած ժամանակահատվածը, մասամբ փոխարկվելով նաեւ ռուսական ռուբլու, նույն եղանակով Պողոսյան եղբայրներին է փոխանցվել Գ. Ավետիսյանի եւ վերջինիս մոր՝ Հ. Ավետիսյանի անունից, որի արդյունքում օրինականացվել է առանձնապես խոշոր չափերի գումար:

Նախապատրաստված նյութերով ՀՀ գլխավոր դատախազության՝ ԱԱԾ մարմիններում քննվող քրեական գործերով վարչությունում հարուցվել է քրեական գործ՝ մի խումբ անձանց կողմից նախնական համաձայնությամբ առանձնապես խոշոր չափերի գումար օրինականացնելու դեպքի առթիվ՝ ՀՀ քրեական օրենսգրքի 190-րդ հոդվածի 3-րդ մասի 1-ին կետով։ ՀՀ գլխավոր դատախազի հանձնարարությամբ նշված քրեական գործն ուղարկվել է ՀՀ ԿԱ ԱԱԾ քննչական վարչություն' նախաքննություն կատարելու համար: