Հայաստան ժամանած օտարերկրյա պատվիրակությունների ղեկավարների հետ Սերժ Սարգսյանը երկկողմ հանդիպումներ կունենա

Սերժ Սարգսյանը երկկողմ հանդիպումներ կունենա Հայոց ցեղասպանության 100-րդ տարելիցի ոգեկոչման արարողություններին մասնակցելու համար Երեւան ժամանած օտարերկրյա պատվիրակությունների ղեկավարների հետ: Երեւանում երկկողմ հանդիպումներ կունենան նաեւ Հայաստան ժամանած նախագահները: Այս մասին ապրիլի 20-ին կայացած հանդիպման ժամանակ ասաց ՀՀ Նախագահի աշխատակազմի ղեկավար, Հայոց ցեղասպանության 100-րդ տարելիցի միջոցառումների համակարգող Վիգեն Սարգսյանը: «Ապրիլի 23-ին եւ 24-ին թեժ է լինելու նաեւ նախագահական նստավայրում: Հայաստան ժամանած օտարերկրյա պատվիրակությունների ղեկավարների հետ Նախագահը երկկողմ հանդիպումներ կունենա, հանդիպումներ կկայանան նաեւ Երեւան ժամանած նախագահների միջեւ: Ծիծեռնակաբերդ այցելությունից հետո օտարերկրյա պատվիրակությունների համար կտրվի պետական ճաշ, այնուհետեւ աշխատանքային հանդիպումներ ողջ օրվա ընթացքում»,- ասաց Վիգեն Սարգսյանը:

Հայոց ցեղասպանության 100-րդ տարելիցին Հայաստան կժամանեն 60 երկրների և միջազգային կազմակերպությունների պատվիրակություններ: Ներկա դրությամբ հայտնի է, որ Հայոց ցեղասպանության զոհերի հիշատակը Ծիծեռնակաբերդում կհարգեն Ֆրանսիայի, ՌԴ-ի, Կիպրոսի եւ Սերբիայի նախագահները: