Ցեղասպանության մասին Բունդեսթագի հրապարակած նոր նախագծի տեքստում մի քանի անգամ նշվում է «ցեղասպանություն» եզրույթը

Գերմանիայի խորհրդարանն իր պաշտոնական կայքում հրապարակել է Հայոց ցեղասպանության հիշատակին նվիրված նոր բանձևի նախագծի տեքստը, որում մի քանի անգամ նշվում է «ցեղասպանություն» եզրույթը: «Արմենպրես»-ի փոխանցմամբ' հայտնի է նաև ապրիլի 24-ին կայանալիք նիստի նախնական օրակարգն ու ժամանակացույցը:

Ապրիլի 24-ին, Գերմանիայի ժամանակով առավոտյան ժամը 9-ին հենց Հայոց ցեղասպանության հարցի քննարկմամբ էլ սկսվելու է լիագումար նիստը: Քննարկմանը հատկացվելու է մեկ ժամ, որի ընթացում 3 զեկույցով են հանդես գալու Գերմանիայի խորհրդարանի ամենախոշոր խմաբկցությունները' Քրիստոնեա-դեմոկրատական միությունը (ՔԴՄ)/Քրիստոնեա-սոցիալիստական միությունը(ՔՍՄ), Գերմանիայի սոցիալ-դեմոկրատական կուսակցությունը և Ձախակողմյանների կուսակցությունը: Դրանից հետո քվեարկության է դրվելու բանաձևի նախագիծն' արդեն «ցեղասպանություն» եզրույթով ու հիմնավորմամբ, թե որ կոնվենցիայի որ կետով են օսմանյան Թուրքիայում տեղի ունեցած ջարդերը ենթակա կոչվելու «ցեղասպանություն»:

Ի տարբերություն Ֆրանսիայի և Հայոց ցեղասպանությունը ճանաչած մյուս երկրների, Գերմանիան երկար ժամանակ ընդդիմացել է «ցեղասպանություն» եզրույթի կիրառմանը: Գերմանիայի դիրքորոշման մեջ շրջադարձ տեղի ունեցավ ապրիլի 20-ին' Գերմանիայի Դաշնության արտաքին գործերի նախարար Ֆրանկ-Վալտեր Շտայնմայերի և կանցլեր Անգելա Մերկելի խոսնակ Շտեֆան Զայբերթի հայտարարություններից հետո: Ապրիլի 20-ին կանցլերի խոսնակը հայտարարել էր, որ կառավարությունը կսատարի ապրիլի 24-ին խորհրդարանում ներկայացվելիք բանաձևին, որով 1915 թվականի եղելությունը հայտարարվում է ցեղասպանության օրինակ:

«Կառավարությունը սատարում է բանաձևի նախագծին, որում Առաջին համաշխարհային պատերազմի տարիներին հայերին բաժին հասած ճակատագիրը պատմության մեջ տեղի ունեցած զանգվածային սպանությունների, էթնիկ զտումների, արտաքսումների և այո՛, 20-րդ դարի ցեղասպանությունների օրինակ է»,- ասել է նա: Նույն օրը Գերմանիայի արտաքին գործերի նախարար Ֆրանկ-Վալտեր Շտայնմայերը կանգնել է այն պատգամավորների կողքին, ովքեր կողմ են հայերի զանգվածային սպանությունները «ցեղասպանություն» անվանելուն և ասել, որ 1915 թ. կատարվածը «կարելի է ընդհանրացնել ցեղասպանություն հասկացության մեջ»:

Գերմանական և միջազգային լրատվամիջոցները նաև տեսակետ են հայտնում, որ ապրիլի 23-ին Բեռլինի Մայր տաճարում կայանալիք Հայոց ցեղասպանության հիշատակի արարողությանը Գերմանիայի Դաշնության Նախագահ Յոահիմ Գաուկն իր ելույթում նույնպես կարտասանի «ցեղասպանություն» եզրույթը: