«Հայոց ցեղասպանության նահատակների իրավունքը պետք է վերականգնվի միայն Ցեղասպանության հետևանքների հատուցմամբ». Հենրի Թերիո

Հայոց ցեղասպանության 100-րդ տարելիցին ընդառաջ գլխավոր հարցը պետք է դառնա ոչ միայն թուրքական ժխտողականության դեմ պայքարն, այլև պահանջատիրության և հատուցման արդարացի հարցի բարձրացումը: Այս առումով ամերիկացի Հենրի Թերիոն, ով 2007թ.-ից ղեկավարում է Հայոց ցեղասպանության փոխհատուցումների խումբն ու Արդարության բանաձևի առաջատար հեղնակն է, շեշտում է, որ թուրքերը պարտավորություն հատուցել մեկ դար առաջ իրագործած Ցեղասպանության համար և դրա համար կան իրավական դրույթներ: «Ցեղասպանությունը բեռ է ոչ միայն հայերի, այլև թուրքերի համար: Նրանք բարոյական պատասխանատվություն են կրում: Փոխհատուցումը, որ պետք է թուրքերը կատարեն, կթեթևացնի հայերի տառապանքը՝ որպես Ցեղասպանության հետևանք: Այդ կերպ թուրքերը մի փոքր կկիսեն անարդարության մի չնչին մասը, որը պատմությունից բաժին է հասել նրանց»,- «Արմենպրես»-ի փոխանցմամբ «Ընդդեմ ցեղասպանության հանցագործության» ֆորումի ժամանակ նշեց Թերիոն՝ հավելելով, որ շուտով կհրատարկվի Արդարության բանաձևի ամբողջական տարբերակը:

Նրա գնահատմամբ, հաղթած կամ ոչ, ժխտողականությունն ունենալու է իր ավարտը: «Ժխտողականության հանդեպ հաղթանակը վերջը չէ, այլ հետցեղասպանության գործընթացի այն մեկնարկը, որ կբերի արդարության վերականգնմանը, այն է՝ ցեղասպանության հետևանքների հատուցումը: ժխտողականության դեմ պայքարը փոխարինի հետևանքների վերացման հարցի բարձրացմամբ»,- ասաց նա՝ շեշտելով, որ Ցեղասպանության հետևանքով հայ ժողովուրդը նյութական, մշակութային, բարոյական, հոգևոր և անգամ ժողովրդագրական վնասներ է կրել:

«Նախ կրճատվել է Հայաստանի տարածքն, որը ներկայում նախացեղասպանության տարածքի չորս տոկոսն է: Բնական ծնելիության ընդհանուր գործակիցն ընկել է, և եթե Ցեղասպանությունը չլիներ, ապա Հայաստանի բնակչությունն այսօր կլիներ 20 միլիոն: Ցեղասպանության ժամանակ թուրքերը վերցրել են հայերի հողերը, բանկային հաշիվները, թանկարժեք իրերը: Բազմաթիվ թուրքեր փաստում են, որ հայկական գույքով է ստեղծվել նոր թուրքական հանրապետության տնտեսությունը: Թուրքական պետությունը հայկական ունեցվածքով է ստեղծվել: Թուրքական կառավարությունն ստացել է այս հ արստությունը, որը հնարավորություն է տվել բարգավաճել»,- ընդգծեց Թերիոն:

Նա շեշտում է, որ Ցեղասպանության հետևանքով Հայաստանի Հանրապետությունը համեմատաբար աղքատ պետություն է, որը չունի որևէ ծովային ելք և ապրում է յոթանասուն միլիոնանոց Թուրքիայի մշտական սպառնալիքի տակ: Թերիոն ընդգծում է, որ այժմ Հայաստանն ունի որոշակի տնտեսական և քաղաքական խնդիրներ, սփյուռքն էլ պայքար է տանում իր ինքնությունը պահպանելու համար, և այս ամենը նույնպես Ցեղասպանության հետևանքն է: «Այս պայմաններում շատ կարևոր է հասնել արդարացի հատուցման, և սա պետք է լինի նոր քաղաքականության և նոր մոտեցման սկիզբը»,- ասաց ն ա: