Ռուանդայի ցեղասպանությունը վերապրողը Երևան է եկել որպես ցավի քույր

Հիսունյոթամյա էսթեր Մուջավայոն Երևան է եկել ոչ միայն հայ ժողովրդի հետ Հայոց ցեղասպանության ցավը կիսելու, այլև հայ ժողովրդի հետ միասին ապացուցելու, որ ինչպես հայերն, այնպես էլ Ռուանդայում ցեղասպանության ենթարկված ցեղախմբերը վերապրել են ու նրանց չեն կարողացել սպանել:

«Ես եկել եմ այստեղ որպես ցավի քույր: Ես այստեղ եմ որպես Ռուանդայի ցեղասպանության վերապրող: Արդեն քսանմեկ տարի է՝ ես ապրում եմ այդ ցավով: Իմ բախտը բերեց և ես ապրեցի: Նրանք սպանեցին իմ ամուսնուն, հորս, քրոջս, ամուսնուս բարեկամներին: Նրանք սպանվեցին, իսկ ես ողջ մնացի, որ իմ մեջ կրեմ այդ ցավը ու ապրեմ այդ հիշողության մեջ»,- «Արմենպես»-ի փոխանցմամբ «Ընդդեմ ցեղասպանության հանցագործության» ֆորումի ժամանակ նշեց նա:

Մուջավայոյի ելույթը ժամանակ առ ժամանակ ընդհատվում էր. վերհիշելով անցյալի սարսափը նա սրբում էր աչքերն ու անընդհատ կրկնում. «Մենք վերապրեցին, մենք պետք է ապրենք հանուն սպավածների»:

«Ձեզ հետ հիշատակելով ձեր ցավը, ես նաև ձեր քույրն եմ, որ փրկվել է, վերապրել»,- նշեց է նա՝ հավելելով, որ հայ ժողովրդին նա նմանեցնում է ծառի, որը չի չորացել, և փոքրիկ ճյուղը կյանք է պարգևել հսկայական ծառին:

«Այդ ծառի ճյուղերն աճում են, ծառը չի մահացել, հայ ժողովուրդը վերածնվել է, այժմ վերածնվում է նաև թութսիների ցեղը»,- ընդգծեց Ռուանդայի ցեղասպանությունը վերապրած էսթեր Մուջավայոն: