Հայերը սպանվեցին հայ և քրիստոնյա լինելու համար. Ռիչարդ Չառնեցկի

Մեկ դար առաջ հայերը սպանվեցին հայ լինելու համար, մեկ դար առաջ հայերը սպանվեցին քրիստոնյա լինելու համար և այսօր, Հայոց ցեղասպանությունից հարյուր տարի անց պետք է հարցն առաջ քաշել, դատապարտել՝ նման գործողությունները հետագայում կանխելու համար: Երևանում «Ընդդեմ ցեղասպանության հանցագործության» ֆորումի ժամանակ նման տեսակետ հայտնեց Եվրոպական խորհրդարանի նախագահի տեղակալ Ռիչարդ Չառնեցկին:

«Արմենպրես»-ի փոխանցմամբ, Չառնեցկին ասաց, որ ինքը գիտի, թե ինչ է նշանակում ցեղասպանություն և գիտի, թե այն ինչ ահավոր չարիք է ցեղասպանություն ապրած սերունդների համար: «Եվրոպական խորհրդարանի անունից, Եվրոմիության 500 միլիոն բնակչության անունից հարգանքի տուրք եմ մատուցում հայ ժողովրդին, ովքեր վերապրեցին Հայոց ցեղասպանություն' ազգային մեծագույն ողբերգությունը: Ինձ ծանոթ է այդ զգացողությունը, ցեղասպանության կենսափորձ ունի նաև Լեհաստանը: Մեկ դար առաջ հայերը սպանվեցին միայն հայ լինելու պատճառով, սպանվեցին միայն քրիստոնյա լինելու պատճառով: Ես հիացմունքով եմ հայացքս հառում հայ ժողովրդին, որ հպարտ է իր պատմական մեծագույն ժառանգությամբ, հիանալի մշակույթվ և քաղաքակրթությամբ: Լեհերը, եվրոպացիները գիտեն, որ կարող ենք կերտել ապագա' թիկունք շրջելով դեպի անցյալը: Այս արարողությունն ու համաժողովը կոչ է աշխարհին և երիտասարդներին, ում ձեռքում է աշխարհի ապագան»,- ասաց Չառնեցկին: