Սենատոր Էդվարդ Մարքին կոչ է արել ԱՄՆ կառավարությանը ճանաչել Հայոց ցեղասպանությունը

ԱՄՆ սենատոր Էդվարդ Մարքին (Մասաչուսեթս) կոչ է արել Միացյալ Նահանգների կառավարությանը լիարժեքորեն ճանաչել Հայոց ցեղասպանությունը: «Այլևս չպետք է 100, 10 կամ անգամ մեկ տարի պահանջվի ԱՄՆ կառավարությունից Հայոց ցեղասպանությունը ճանաչելու համար»,- «Արմենպրես»-ի փոխանցմամբ' Թվիթերի իր միկրոբլոգի միջոցով հայտնել է ամերիկացի սենատորը:

«Ես հպարտ եմ կանգնել հայ առաջնորդների կողքին և ԱՄՆ-ին կոչ անել Հայոց ցեղասպանության 100-րդ տարելիցին պատշաճ կերպով ճանաչել այն»,- մեկ այլ գրառման ասել է նա:

1915 թվականին հայերի զանգվածային սպանությունների տարելիցի օրը ԱՄՆ-ը մտադիր է կոչ անել Թուրքիային և Հայաստանին ընդունել այդ ողբերգական իրադարձությունների հետ կապված բոլոր փաստերը:

Այս մասին ապրիլի 24-ին հայտնել է Սպիտակ տան մամուլի քարտուղարի տեղակալ Էրիկ Շուլցը:

Ավելի վաղ Սպիտակ տան պաշտոնյաները ԱՄՆ հայ համայնքին հայտնել էին, որ ԱՄՆ նախագահ Բարաք Օբաման այս տարի ևս իր ապրիլքսանչորսյան ուղերձում չի օգտագործի Հայոց ցեղասպանություն եզրույթը:

Օբամայի նման որոշումը Հայ դատի ԱՄՆ հանձնախմբի ղեկավար Քեն Խաչիկյանն անվանել է «ազգային ամոթ», «դավաճանություն վտահությանն ու ճշմարտությանը»: Իսկ միջազգային և ամերիկյան լրատվամիջոցների մոտ ԱՄՆ նախագահի այս դիրքորոշումը հարցեր է առաջացնում նրա տված խոստման արժանահավատության վերաբերյալ: