Դիրիժոր Միխայիլ Յուրովսկին կարևորում է «24/04» նվագախմբի համերգը

Երաժշտության միջոցով հնարավոր է արտահայտել ցանկացած բան: Հայտնի դիրիժոր Միխայիլ Յուրովսկին փաստում է՝ անսահման երջանիկ է ապրիլի 24-ին մասնակցելու «24/04» նվագախմբի համերգին, թեև այն տխուր միջոցառման է նվիրված:

«Մենք ոգեկոչում ենք ոչ միայն 1915 թվականի, այլև Հոլոքոստի և բոլոր նրանց հիշատակը, որոնք զոհվեցին չար ուժերի պատճառով: Ես անսահման երջանիկ եմ ընկերներիս շրջապատում լինելու և այն մթնոլորտի համար, որում նվագում ենք մեր երաժշտությունը: Մեր նվագախմբում 43 ազգերի ներկայացուցիչներ են, և ես անսահման երջանիկ եմ, որ մենք հասկանում ենք միմյանց հիմնականում առանց թարգմանչի»,- «Արմենպրես»-ի փոխանցմամբ' լրագրողների հետ զրույցում նշեց Միխայիլ Յուրովսկին:

Նա նշեց, որ երաժշտությամբ կարելի է ամեն ինչ ասել, բայց ամենակարևորը, որ երաժշտությունը պետք է մարդկանց մարդասիրություն պարգևի: «Մենք աշխարհ խաղաղություն ենք բերում երաժշտությամբ»,- հավելեց Յուրովսկին:

Անվանի դիրիժորը հայկական երաժշտության նկատմամբ անտարբեր չէ: «Հայկական երաժշտությունն ինձ համար հիասքանչ կոմպոզիտորական դպրոցն է, որը ես գիտեի մանուկ և պատանի հասակում, որովհետև իմ հայրն անվանի կոմպոզիտոր Վլադիմիր Յուրովսկին էր, և մենք շփվում էինք ԽՍՀՄ բոլոր հանրապետությունների, մասնավորապես, Հայաստանի կոմպոզիտորների հետ: Ես նույն տանն ապրել եմ, որտեղ և՝ Արամ Խաչատրյանը, շփվել Ալեքսանդր Հարությունյանի, Առնո Բաբաջանյանի հետ: Ինձ համար այս ազգանունները ոչ միայն մշակույթի մեծերի անուններ են. նրանք մարդիկ են, ովքեր մինչև այսօր կենդանի են և իմ մեջ են»,- նշեց նա:

Աշխարհի 43 երկրների 123 երաժիշտներից բաղկացած «24/04» նվագախումբը վերջին փորձերն է կատարում ապրիլի 24-ի համերգին ընդառաջ: «Վերածնունդ» խորագրով համերգը տեղի կունենա ժամը 20:15-ին Հանրապետության հրապարակում: Նվագախմբի կազմում ելույթ կունենան երաժիշտներ աշխարհի տարբեր ծայրերից: Որպես մենակատարներ հանդես կգան ջութակահար, միջազգային մրցույթների հաղթող, Յան Սիբելիուսի անվան միջազգային մրցույթի պատմության մեջ ամենաերիտասարդ դափնեկիր, Եղիսաբեթ թագուհու անվան միջազգային մրցույթի առաջին մրցանակակիր Սերգեյ Խաչատրյանը, թավջութակահար, Չայկովսկու անվան, Կորեայի Geongnam, ԱՄՆ-ի Johansen երիտասարդ կատարողների, Արամ Խաչատրյանի անվան միջազգային մրցույթների դափնեկիր Նարեկ Հախնազարյանը, դուդուկի մեծ վարպետ Ջիվան Գասպարյանը:

Մենակատարների թվում են նաև բարիտոն, ՀՀ վաստակավոր արտիստ Գևորգ Հակոբյանը, ՅՈՒՆԻՍԵՖ-ի Բարի կամքի դեսպան Մարիա Գուլեգինան, ով այսօր աշխարհում ամենաշատ պահանջված սոպրանոներից է:

Չորս մասից բաղկացած համերգում կհնչեն Արամ Խաչատրյանի, Էդգար Հովհաննիսյանի, Ղազարոս Սարյանի, Ալեքսանդր Հարությունյանի, Մակար Եկմալյանի, Ավետ Տերտերյանի, Էդվարդ Միրզոյանի և այլոց ստեղծագործությունները:

Ելույթներն ուղեկցվելու են տեսապատկերներով, որոնց միջոցով կներկայացվեն Արևմտյան Հայաստանի բնակավայրերը, մշակույթը, հայկական ավանդույթները: Կցուցադրվեն տեսարաններ ջարդից, գաղթի ճանապարհից: Անդրադարձ կլինի մեծ հումանիստներին, ովքեր կարևոր դեր են ունեցել հայ ժողովրդի ոտնահարված իրավունքների պաշտպանության, հայ գաղթականների փրկության հարցում:

Համերգը ղեկավարելու են դիրիժորներ Հովհաննես Չեքիջյանը, Սերգեյ Սմբատյանը, Ջանլուկա Մարչիանոն, Միխայիլ Յուրովսկին: