Թուրքիան այժմ 7 երկրներում դեսպան չունի, հերթը հասել է Մոսկվային եւ Բեռլինին. «Հուրիեթ»

Արտաքին Քաղաքական 23 Ապրիլ, 2015 19:22

Թուրքիան ներկա դրությամբ 7 երկրներում դեսպան չունի' տարբեր պատճառներով նրանց հետ կանչելու արդյունքում, եւ ինչպես երեւում է' հերթը հասել է Մոսկվային եւ Բեռլինին:

Այս մասին, ինչպես հաղորդում է «Արմենպրես»-ը, հայտնում է թուրքական «Հուրիեթ» թերթը' նշելով, որ վերջին երկիրը, որտեղից Թուրքիան հետ է կանչել իր դեսպան Հասան Գյողուշին, Ավստրիան է, իսկ պատճառն է այդ երկրի խորհրդարանի կողմից Հայոց ցեղասպանության ճանաչումն ու դատապարտումը:

Վերջին երեք տարիների ընթացքում Թուրքիան իր դեսպաններին հետ է կանչել Եգիպտոսից, Սիրիայից, Իսրայելից, Լիբիայից, Եմենից, Վատիկանից եւ Ավստրիայից: Մինչ այժմ Թուրքիան այդ երկրներում նոր դեսպաններ դեռեւս չի նշանակել:

Թերթը գրում է, որ հնարավոր է' Անկարան իր դեսպանին հետ կանչի նաեւ Մոսկվայից, քանի որ Ռուսաստանի Դաշնության Նախագահ Վլադիմիր Պուտինը 1915 թվականի իրադարձությունների հետ կապված Մոսկվայում կազմակերպված միջոցառման ժամանակ հայկական ջարդերը «ցեղասպանություն» է բնութագրել:

Ըստ թերթի' Թուրքիան կարող է իր դեսպանին հետ կանչել նաեւ Բեռլինից, եթե, ինչպես ենթադրվում է, Գերմանիայի Դաշնային խորհրդարանը ապրիլի 24-ի իր նիստում ընդունելիք բանաձեւում 1915 թվականի իրադարձությունները բնութագրի «ցեղասպանություն»:

2012-2014 թվականների ընթացքում Հայոց ցեղասպանության ճանաչման պատճառով Թուրքիան իր դեսպաններին հետ է կանչել 12 երկրներից: Չնայած Անկարայի այդ ջղագրգիռ քայլերին, կարճ ժամանակ հետո Թուրքիան վերադարձրել կամ նոր դեսպաններ է նշանակել Հայոց ցեղասպանությունը ճանաչացած այդ երկրներում: