«Արթնացրեք հոգիները». System of a Down-ը երևանյան համերգով Թուրքիայից պահանջեց չժխտել ակնհայտը՝ պատմությունը

System of a Down խումբն աննկարագրելի համերգ պարգևեց հայ հանդիսատեսին. ապրիլի 23-ին Երեւանի Հանրապետության հրապարակը լի էր ոգեւորությամբ, ապագայի հանդեպ վճռականության ու հավատի ճիչերով: Երեւանում ռոք սիրողները շատ են, ու խորհրդանշական այս օրը Հայոց ցեղասպանության 100-րդ տարելիցի արարողություններն ուղեկցվեցին ոչ միայն սգո երթերով ու ուղերձներով, այլ վերածննդի ու արարելու հաստատակամությամբ:

«Արմենպրես»-ի փոխանցմամբ՝ ակնկալվում էր, որ համերգը դիտելու կգա 50 հազար հանդիսատես. հրապարակն ու հարող փողոցներն ամբողջությամբ լիքն էին, համերգին հետեւում էին նաեւ հարևան ադմինիստրատիվ կառույցների պատշգամբներից: Համերգն անցավ հորդառատ անձրևի ներքո:

SOAD-ը Երեւան էր բերել Հայոց ցեղասպանության իրազեկմանը նվիրված «Արթնացրեք հոգիները» (Wake Up the Souls) խորագրով շրջագայության համերգացանկը'համեմելով այն հայկական երաժշտությամբ. հատվածներ հնչեցին «Սարդարապատ», «Ղափամա», «Աման Թելո» երգերից:

Համերգի ժամանակ երգիչ Սերժ Թանկյանը նշեց, որ թուրքը փրկել է իր տատիկին ցեղասպանության ժամանակ: «Թուրքական կառավարությունը պետք է այս մարդկանց հերոսներ անվաներ, փոխանակ ժխտելու ակնհայտը՝ պատմությունը: Իմ պապիկը հինգ տարեկան էր, երբ տեսավ, թե ինչպես իր հայրը մահացավ: Նա կորցրեց իր տեսողությունը քաղցի պատճառով: Նա հայտնվեց Հունաստանի որբանոցում: Այն փաստը, որ ԱՄՆ ղեկավարությունը սխալ բառեր է օգտագործում, որպեսզի նկարագրի դեպքերը, սարսափելի է ոչ միայն մեզ, այլև ամերիկացիների համար: Մենք, որպես փրկվածների ժառանգներ, պետք է նայենÖ „ բոլոր կառավարությունների աչքերին հավասարը հավասարի սկզբունքով: Անկախության 20 տարվանից հետո դեռ շատ աշխատանք կա անելու»,-ընդգծեց Սերժ Թանկյանը: «Մենք System of a Down-նն ենք, և մեր պարտականությունն է ասել դա ձեզ, շնորհակալություն»,-եզրափակեց նա: